Кытай “жапон милитаризминин кайра жанданышына жол бербейт” деп билдирип, бир Кытай принциби боюнча эл аралык консенсусту колдоо үчүн Пекин бардык тараптар менен бирге иштей турганын билдирди, дейт мамлекеттик Xinhua маалымат агенттиги.

«Кытай Япониядагы оңчул күчтөрдүн тарыхты артка кайтаруусу үчүн эч качан жол бербейт, тышкы күчтөрдүн Кытайдын Тайвань аймагына кийлигишүүсүнө жана жапон милитаризминин кайра жанданышына мүмкүнчүлүк бербейт», — деди тышкы иштер министри Ван И ишемби күнү Душанбеде Тажикстандын тышкы иштер министри Сирожиддин Мухриддин менен болгон өзүнүн биринчи стратегиялык диалогунда.

Ал кошумчалап: «Пекин Бир Кытай принциби боюнча эл аралык консенусту сактоо үчүн бардык жактар менен бирге иштейт жана Экинчи дүйнөлүк согуштагы жеңиштин кыйынчылык менен алынган натыйжаларын биргеликте коргойт» деди.

Бул билдирүүлөр Япониянын премьер-министри Санаэ Такаичинин Кытай Тайванга кол салса, бул Токионун коопсуздук мыйзамдары боюнча «жашоого коркунуч туудурган абал» болуп эсептелиши мүмкүн экенин жана натыйжада Токиого «жамааттык өзүн-өзү коргоо укугун» колдонууга шарт түзүлүшү ыктымал деп билдиргенинен кийин айтылган.

Кытай бул сөздөрдү катуу сындады. Аталган билдирүүлөр Такаичинин бул айдын башында Азия-Тынч океан экономикалык кызматташтык (APEC) форумунун алкагында Кореяда Кытай президенти Си Цзинпин менен жолукканынан бир нече күн кийин айтылган.

Такайчинин Тайван тууралуу айткандарына байланыштуу жүз миңдеген кытай туристтери Японияга сапарларын жокко чыгарганы кабарланды, ал эми Токио Пекин деңиз азыктарын импорттоого тыюу салганын билдирди.

Пекин ошондой эле Япония жана Түштүк Корея менен маданият министрлеринин үч тараптуу жыйынын кийинкиге калтырган; бул чечим Токионун сынын жаратты.