Азербайжан-Грузия чек арасына жакын жерде кулаган C-130 аскердик жүк ташуучу учагынын чоң бөлүгү Түркияга алып келинди.

Окуядан кийин дароо түзүлүп аймакка жиберилген «кырсыкты иликтөө» тобу өз ишин улантууда. Аймактагы кеңири иликтөөлөрдөн кийин учактын калдыктары жүк ташуучу унааларга кылдаттык менен жүктөлдү. C-130 тетиктеринин көпчүлүгү Түркияга алынып келинди.

Калдыктар Улуттук коргоо министрлигинин Аскердик заводдор департаментине караштуу, Борбордук Анадолудагы Кайсери облусунда жайгашкан 2-Аба тейлөө заводу башкармалыгында каралат.

Ошол эле учурда учактын кара кутусун чечмелөө башталды. Окуянын себеби жеринде текшерүүлөр жана кара кутуну чечмелөө аяктагандан кийин такталары күтүлүүдө. Кырсыкты иликтөө тобу ал жерде дем алыш күндөрүнө чейин иштөөнү улантат.

Түрк аба күчтөрүнө таандык C-130 учагы 11‑ноябрда Азербайжан-Грузия чек арасына жакын жерде кулап, борттогу 20 кызматкердин баары каза болгон.

Улуттук коргоо министри Яшар Гүлер дүйшөмбү күнү Президент Режеп Таййип Эрдогандын төрагалыгы астындагы Кабинет жыйынынан кийин журналисттерге учуу жазгычтарын чечмелөө жана алдын ала жыйынтыктарды алуу кеминде эки айга созулаарын айтты.

Министр: "Алдын ала жыйынтыктарга ылайык так эмес болсо да, биринчи куйрук үзүлгөн. Андан кийин үчкө бөлүнгөн. Булар кара кутудан аныкталат", - деди. Кара куту учурда Түрк аэрокосмостук өнөр жайы (TUSAŞ) тарабынан текшерилип жатканын кошумчалады.