Пезешкиан шаршемби күнү X социалдык тармагындагы баракчасында Россия жана Пакистандын лидерлери менен сүйлөшкөнүн кабарлап, буларды жазды:"Ирандын аймакта тынчтыкка болгон берилгендигин ырастайм. Сионисттик режим жана АКШ баштаган бул согушту токтотуунун бир гана жолу Ирандын мыйзамдуу укуктарын таануу, компенсация жана келечектеги агрессияга каршы күчтүү эл аралык кепилдиктер".
Израиль менен АКШнын 28-февралдан бери Иранга каршы жүргүзгөн биргелешкен чабуулдарынан кийин аймактык чыңалуу кескин курчуду. Ирандык расмий өкүлдөрдүн маалыматына караганда, бул кол салууларда ушул күнгө чейин Ирандын мурдагы диний лидери Али Хаменеи баш болгон 1 300дөн ашуун адам каза болуп, 10 000ден ашууну жаракат алды.
Тегеран буга жооп катары Израилди, Иорданияны, Иракты жана АКШнын аскердик объектилери жайгашкан Булуң өлкөлөрүн учкучсуз аппараттар жана ракеталар менен бутага алды.
Ошондой эле, Иран дүйнөлүк мунайдын болжол менен 20%ын дүйнөлүк рынокко жеткирүүчү маанилүү Ормуз кысыгын жапты.
АКШнын аскердик базаларына келтирилген зыян
«New York Times» гезитинин шаршемби күнү жарыяланган анализине ылайык, Жакынкы Чыгыштагы АКШнын кеминде 17 аскердик, дипломатиялык жана абадан коргонуу объектиси Ирандын учкучсуз аппараттары жана ракеталык чабуулдарынан улам зыян тарткан.
Зыян тарткан объектилердин кеминде 11и аскердик базалар же курулуштар болуп саналат. Бул көрсөткүч аймактагы жалпы америкалык аскердик объектилердин дээрлик жарымын түзөт.
Абадан коргонуу системалары эң чоң чыгым алып келген жоготуулардын катарына кирди. Спутниктен алынган сүрөттөр Катардын Умм-Дахал шаарына жакын жерде жайгашкан, 4 800 чакырым аралыкты көзөмөлдөөгө ылайыкталган, баасы 1,1 миллиард долларлык эрте эскертүүчү радардын жабыркаганын көрсөтүүдө.
Ошондой эле, анализге ылайык, Иран THAAD (бийик тоолуу аймактык абадан коргонуу системасы) компонентерине да чабуул жасаган.
New York Times гезити конгресстин өкүлүнүн билдирүүлөрүнө таянып, Пентагондун 28-февралда Бахрейндеги АКШнын деңиз флотунун Бешинчи Флотунун штаб-квартирасына келтирилген зыянды болжол менен 200 миллион доллар экендигин жазды.
Иран ошондой эле АКШнын дипломатиялык имараттарын бутага алып, Дубайдагы АКШнын консулдугун, Кувейт шаарындагы жана Эр-Рияддагы элчиликтерин убактылуу жапкан. Бул чабуулдарда эч ким жабыркаган жок.
АКШ жетекчилери New York Times гезитине кол салуулардын Ирандын бул согушка Трамп башкаруусундагы бир топ киши болжолдогондон дагы көп даяр экендигин көрсөткөнүн айтты.
«Алсыратуу согушу»
Ирандын Төңкөрүш Гвардиясы кагылышуунун 12 - күнүндө АКШ жана Израилдин кызыкчылыктары менен байланыштуу экендигин ойлогон "экономикалык борборлорду жана банктарды" бутага алаарын билдирди. Бул окуя эл аралык компаниялардын кызматкерлерин Дубайдан эвакуациялашына алып келди.
Төңкөрүш Гвардиясынын башкы командиринин кеңешчиси Али Фадав мамлекеттик телекөрсөтүүгө берген маегинде АКШ менен Израилдин Америка экономикасын жана дүйнөлүк экономиканы жок кыла турган узак мөөнөттүү согушка кирүү ыктымалдыгын эске алышы керектигин айтты.
Иран Перс булуңундагы эки кемеге Ирандын деңиз флотунун эскертүүлөрүнө кулак салбай, Ормуз кысыгына киргени үчүн чабуул жасаганын ырастады.
Ирандын жогорку аскердик кеңешчиси генерал-майор Яхья Рахим Сафави Ирандын Израилди жок кылуу боюнча көптөн бери келе жаткан коркутууларын кайталады.
