Россия менен Украина үч кишинин каза болушу жана 10дон ашуун кишинин жараланышына жол ачкан дрон кол салууларынан улам бири бирин айыптап жатат.

Ульяновск губернатору Алексей Русских араларында бир бала да болгон сегиз адамдын  жаракат алганын билдирсе, Воронеж губернатору Александр Гусев төрт адамдын жаракат алганын жана аймакта 88 дрондун атып түшүрүлгөнүн билдирди.

Ростов губернатору Новошахтинск мунай иштетүүчү заводунун жабыркаганын жана  иши токтотулганын, бирок эч кимдин жабыркабаганын маалымдады.

Россиянын Коргоо министрлиги түн ичинде 18 аймакта, Кара деңиздин үстүндө жана оккупацияланган Крымда жалпысынан Украинанын 592 дронун атып түшүргөнүн билдирди.

Украинадагы кол салуулар

Россия түнкү чабуулдарда Киевдин жакындарындагы украин компаниясы Fire Pointко таандык дрон чогултуу заводуна, ошондой эле Одессада украиналык аскерлерге колдоо көрсөткөнү айтылган логистикалык борборлор жана порт инфраструктурасы талкаланганын билдирди.

Украина аба күчтөрү түнкүсүн учурулган 295 орус дрондун 267си атып түшүрүлгөнүн жарыялады.

Акыркы айларда эки тарап тең логистикалык, порттук жана энергетикалык инфраструктурага чабуулдарын күчөтүп, жарандарды атайылап бутага алып жатат деген айыптоолорду четке кагышты.