Президент Режеп Таййип Эрдоган Баку энергетика жумалыгына жолдогон кайрылуусунда Түркия менен Азербайжандын ортосундагы энергетика кызматташтыгынын эки өлкөгө гана пайда келтирбестен, бүтүндөй аймактын жана Европанын энергетикалык коопсуздугун бекемдей турганын айтты.
Эрдоган дүйшөмбү күнү Азербайжандын борбор шаары Бакуда өткөрүлгөн Баку энергетика жумалыгында Түркия Республикасынын энергетика жана жаратылыш ресурстары министри Алпарслан Байрактар тарабынан окулган катында акыркы кездеги глобалдык геосаясий окуялар Түркия-Азербайжандын энергетикалык коопсуздук кызматташтыгынын маанисин дагы бир жолу далилдегенин белгиледи.
Эрдоган: «Баку-Тбилиси-Жейхан, Баку-Тбилиси-Эрзурум куурлары жана ТАНАП сыяктуу инфраструктуралык инвестициялар менен таажыланган бул кызматташтык Түркия менен Азербайжанга гана пайда алып келбестен, аймактын жана Европанын энергетикалык коопсуздугуна да олуттуу салым кошууну улантууда»,-деп кошумчалады.
Президент март айында ачылган Ыгдыр-Нахчыван куурунун эки өлкөнүн ортосундагы узак мөөнөттүү жана ийгиликтүү энергетика кызматташтыгынын акыркы үлгүсү экенин белгиледи.
«Линиянын ишке кириши Нахчыван аймагынын энергия менен камсыздоо коопсуздугун бекемдеди жана бизди биргелешип күчтүү кылды», - деди ал.
Стратегиялык долбоорлор
Эрдоган Түркия менен Азербайжандын ортосундагы электр байланышын арттыруунун дагы бир стратегиялык мааниге ээ проекти экенин белгиледи.
Түркия менен Нахчыван жана Түркия менен Грузиянын ортосундагы байланыш дараметин дагы арттыруу керектигин баса белгилеген Эрдоган:«Түркия-Азербайжан, Грузия жана Болгариянын ортосунда жаңы электр байланыш линиясын куруу үчүн «Жашыл электр энергиясын өткөрүү жана соодасы боюнча кызматташуу боюнча өз ара түшүнүшүү меморандумуна» кол койдук»,-деди.
«Аймакыбыздын энергетикалык коопсуздугу жана гүлдөп өнүгүүсү үчүн дагы бир тарыхый кадам болгон бул долбоорду тез арада бүтүрүүнү максат кылуудабыз», - деп кошумчалады ал.
Эрдоган эки өлкөнүн ортосунда жаңы жаратылыш газ долбоорлору үчүн маанилүү потенциалдын бар экенин айтты.
Эрдоган:«Азербайжан көп жылдардан бери Түркияга да, Европага да олуттуу көлөмдө газ жеткирип келет жана анын глобалдык энергетика рыногундагы стратегиялык ролу өзгөчө азыркы кырдаалда чоң мааниге ээ», - деп түшүндүрдү.
Президент Эрдоган:«Жакынкы мезгилде түркмөн газын Азербайжан жана Түркия аркылуу экспорттоо боюнча кызматташуубузду өнүктүрүү үчүн маанилүү мүмкүнчүлүк бар, бул бардык тараптарга пайда алып келет.Бул долбоор жеткирүү жолдорун диверсификациялоого да, аймактык гүлдөп-өнүгүүгө да салым кошот»,-деди.
