Тышкы иштер министрлиги, Глобалдык Сумуд флотилиясына кол салуудан кийин Израиль тарабынан кармалган 14 түрк жаранын кайтаруу үчүн Түркиянын аракеттерин улантып жатканын маалымдады.

Министрликтин басма сөз катчысы Өнжү Кечели дүйшөмбү күнү X платформасында “Учурда Израилде кармалып турган 14 жараныбыздын эртең (7-октябрь) Иордания аркылуу өлкөбүзгө кайтып келиши үчүн аракеттер уланууда”, – деди жана чоо-жайы күндүн аягында такталышы күтүлүп жатканын айтты.

Министрлик Иордания жана Израиль бийликтери менен тыгыз байланышта болуп, калган туткундардын коопсуз кайтарылышын камсыз кылуу үчүн иш алып барууда.

Израилдин рейди учурунда мыйзамсыз кармалган 36 түрк жараны Анкара уюштурган атайын рейс менен ишемби күнү Түркияга алып келинген.

Сумуд флотилиясына рейд

Израилдин деңиз күчтөрү шаршемби күнү кечинде Глобалдык Сумуд флотилиясын мыйзамсыз токтотуп, 50дөн ашуун өлкөдөн 470тен ашуун активистти кармап кеткен.

Гуманитардык жардам ташыган кемелерден турган бул кербен Газага медициналык каражаттарды жана зарыл буюмдарды жеткирүү максатында жолго чыккан. Газа дээрлик 18 жылдан бери Израилдин курчоосунда турат.

Израилдин аймакта улантылып жаткан кол салуусу 67 миңден ашуун палестиналыктын, көбү аялдар менен балдардын өмүрүн алды. Газанын көптөгөн жери кыйрап, калктын дээрлик бардыгы жер которууга аргасыз болду.