Нью-Йорк шаары жаңы мэрин шайлоонун алдында турат. Демократиялык партиянын талапкери Зохран Мамдани Америкадагы эң чоң шаарды башкарууга умтулган үч талапкердин бири катары алдыда турат.
Шайлоо жарышынын канчалык кызуу жүрүп жатканын көрсөткөн бир белги катары, Нью-Йорк шаарынын Шайлоо кеңешинин маалыматы боюнча, эрте добуш берүүдө 735 000ден ашуун бюллетень тапшырылып, жаңы рекорд коюлду.
Бул жогорку катышуу мэрликке болгон жарыш улуттук жаңылыктарда башкы темалардын бири болуп турган учурда катталды. Бул көбүнчө Мамданинин фигурасына байланыштуу, анткени ал шейшемби түнү жеңишке жетсе, шаар тарыхындагы биринчи мусулман жана түштүк азиялык мэр, ошондой эле демократиялык социалисттик көз карашты ачык карманган биринчи лидер болмокчу.
Мамдани Америкадагы эң кымбат шаарлардын бири болгон Нью-Йоркто жашоо шарттарын жеткиликтүү кылуу платформасы менен үгүт жүргүзүп келет. Ал шайлоочулардын негизги экономикалык көйгөйлөрүнө көңүл буруп, солчул саясаты жана Палестинаны колдогон позициясы үчүн демократтардын өзүнөн да сын-пикирлерди четке кагууда.
Мамдани Нью-Йоркто ижара акысы жөнгө салынган үйлөрдө жашаган адамдар үчүн ижара акысын тоңдурууну, универсалдуу акысыз бала бакчаларды, шаар боюнча акысыз автобустарды жана шаар тарабынан башкарылган азык-түлүк дүкөндөрүн ачуу аркылуу азык-түлүк баасын төмөндөтүүнү сунуштоодо.
Бул сунуштардын баарын ал корпоративдик салыктын ченин 11,5 пайызга көтөрүү (коңшу Нью-Джерсиде да ушундай чен бар) жана жылына 1 миллион доллардан ашык киреше тапкан адамдарга 2 пайыздык киреше салыгын киргизүү аркылуу каржылоону көздөйт.
Мамдани, Коумо жана Слива
Анын атаандаштарынын арасында мурдагы Нью-Йорк губернатору Эндрю Куомо жана Республикалык партиянын талапкери, оңчул активист жана радио алып баруучу Кертис Слива бар.
Куомо июнь айында Мамданиге Демократиялык партиянын баштапкы шайлоосунда утулуп, көз карандысыз талапкер катары жарышка чыккан. Ал өзүн көп жылдык мамлекеттик кызмат тажрыйбасы менен шаарды башкарууга эң ылайыктуу талапкер катары көрсөтүүгө аракет кылууда. Бирок анын губернаторлук учурундагы бир катар талаштуу окуялар, анын ичинде сексуалдык кыянаттык жана коркутуу боюнча айыптоолор, анын аброюна көлөкө түшүрүүдө.
Куомо АКШнын мурдагы президенти Дональд Трамптын колдоосуна ээ болду. Трамп Мамданини "коммунист" деп атап, эгер ал жеңишке жетсе, Нью-Йорк шаарына федералдык каржылоону токтотуу менен коркутууда.
Ал эми Слива Куомого Мамданини жеңүү мүмкүнчүлүгүн берүү үчүн жарыштан чыгуу чакырыктарын четке какты. Бирок анын мындай кадамы шайлоонун жыйынтыгына кандай таасир этери белгисиз.
Real Clear Politics сайтынын сурамжылоолорунун жыйынтыгы боюнча, Мамдани шайлоо күнү алдында 14,3 пайыздык чоң айырма менен алдыда турат.
Сурамжылоолор Мамданинин 46,1 пайыз добуш менен алдыда экенин, Куомонун 31,8 пайызда экенин жана Сливанын 16,3 пайыз менен үчүнчү орунда экенин көрсөтүүдө. Сливанын тарапташтары Куомону колдойбу же жокпу, азырынча белгисиз.
Айрым сурамжылоолор Мамданинин артыкчылыгын аз гана айырма менен көрсөтсө, башкалары анын эки эсе көп добуш топтоп жатканын белгилейт. Шайлоо күнү эртең мененки саат 6да (1100GMT) башталып, кечки саат 9да (0200GMT шаршемби) аяктайт. Бирок ошол убакта кезекте тургандарга добуш берүү укугу берилет.
