Быйылкы Санкт-Петербург экономикалык форуму "Прагматикалык диалог: туруктуу келечекке жол" деген темада 3-6-июнь күндөрү Санкт-Петербургдагы ExpoForum конгресс жана көргөзмө борборунда өтүүдө.
Кремлдин тышкы саясат боюнча кеңешчиси Юрий Ушаков кечээ берген маалыматында форумга 100дөн ашык өлкөдөн 20 000ге жакын адам катышаары күтүлүп жатканын билдирди.
Россиянын президенти Владимир Путиндин 5-июнда негизги сессияга катышып, сөз сүйлөп, суроолорго жооп берери күтүлүүдө.
Өзбекстандын президенти Шавкат Мирзиёев, Танзаниянын президенти Самия Сулуху Хасан, Кытайдын вице-премьер-министри Хан Чжэн жана Сауд Арабиясынын энергетика министри Абдулазиз бин Салман форумга катышаары күтүлүп жаткан башка негизги инсандардын арасында орун алды.
Быйылкы ардактуу конок катары белгиленген Сауд Арабиясы форумга энергетика, өнөр жай, транспорт жана каржы тармактарынын өкүлдөрүнөн турган чоң делегация менен катышары күтүлүүдө.
"SPIEF (Петербург эл аралык экономикалык форуму) 1997-жылдан бери Санкт-Петербургда өткөрүлүүдө. Россия өзгөчө Украина согушунан кийин Батыш өлкөлөрү менен экономикалык байланыштары начарлаган мезгилде форумду Азия, Африка, Жакынкы Чыгыш жана Глобалдык Түштүк өлкөлөрү менен кызматташууну алдыңкы планга чыгарган платформа катары колдонууда.
Форумда Россия менен катышуучу өлкөлөрдүн ортосунда ар кандай экономикалык жана соода келишимдерине кол коюлушу күтүлүүдө.
Санкт-Петербургга жасалган катуу дрон чабуулдары
Форум башталган күнү Санкт-Петербургда жана анын тегерегинде дрондордун катуу чабуулдары да көңүлдөрдү бурду.
Санкт-Петербург губернатору Александр Беглов социалдык медиа баракчасында дрон чабуулдары Санкт-Петербургдун Кронштадт, Киров жана Красносельск аймактарындагы инфраструктураны бутага алганын билдирди.
Санкт-Петербургдагы мунай иштетүүчү заводдорго жана башка жарандык аймактардагы дрон чабуулдарынын сүрөттөрү социалдык медиада бөлүшүлдү.
Ленинград облусунун губернатору Александр Дрозденко да түн ичинде аймактын үстүнөн 59 дрон атып түшүрүлгөнүн билдирди.
Чабуулдардын айынан Санкт-Петербургдагы Пулково аэропортундагы каттамдар убактылуу чектелип, орус маалымат каражаттары көптөгөн каттамдардын кечигип жатканы тууралуу кабарлашты.
Украинанын президенти Владимир Зеленский Россиядагы айрым "маанилүү буталарга" чабуул жасалганын жарыялады.
