АКШнын Коргоо министрлигинин жогорку даражалуу кызматкери АКШнын Газага аскерлерин жайгаштырбай турганын ырастап, Вашингтондун аймакка жакын жерде 500 миллион долларлык аскердик база курууну пландап жатканы тууралуу Израилдин маалымат каражаттарынын билдирүүлөрүн четке какты.
Атын атагысы келбеген жетекчи Анадолу агенттигине берген билдирүүсүндө: "Израилдик маалымат каражаттарында тараган кабарлар чындыкка дал келбейт", - деди.
Пентагондун өкүлүнүн айтымында:"АКШнын аскер кызматкерлери учурда эл аралык аскердик өнөктөштөр менен биргеликте келечектеги Эл аралык турукташтыруу күчтөрүнүн (ISF) курамына кире турган эл аралык күчтөрдү жайгаштыруу боюнча мүмкүн болгон базалык варианттарды иштеп чыгууда. ISFтин түзүлүшү АКШнын президенти Дональд Трамптын Газа тынчтык планын колдойт. Тактап айтканда, АКШнын бир дагы аскери Газага жайгаштырылбайт. Буга байланыштуу бардык маалыматтар жалган", - деп билдирди.
Израилдик Ynet жана Shomrim басылмалары буга чейин АКШ Газанын чек арасына жакын жерде бир нече миңдей адамды кабыл ала турган ири аскер базасын курууга даярданып жатканын кабарлашкан.
Yedioth Ahronoth гезити аты аталбаган израилдик расмий өкүлдөргө таянып, мындай объект АКШнын Израилдеги активдүүлүгүнүн олуттуу кеңейишин билдирерин жана бул Израилдин аймагында биринчи ири америкалык аскердик база болорун жазды.
Гезит Вашингтондун Газада эки жылдан бери уланып жаткан геноцид учурунда бир THAAD ракетадан коргонуу системасын орнотконун жана мунун 12 күндүк кагылышуу учурунда Ирандын ракеталары менен учкучсуз учактарын токтотуу үчүн колдонулганын да кошумчалады.
Израилдик бир расмий өкүл гезитке: "Израиль жеринде Америка базанын түзүлүшү Вашингтондун Газага жана кеңири Израиль–Палестина кагылышуусуна катышууга канчалык чечкиндүү экенин көрсөтүүдө", — деди.
Учурда Израилдин түштүгүндөгү Кириат-Гат шаарында АКШнын колдоосундагы Аскердик -жарандык координация борборунда (CMCC) тынчтык келишимди көзөмөлдөө үчүн болжол менен 200 америкалык аскер кызматкери жайгашкан.
Израилдик расмий өкүлдөрдүн айтымында, бул борбор Газага гуманитардык жардамдын таратылышына толук көзөмөл жүргүзүп, Израилдин COGAT механизминин ордуна өтүшү күтүлүүдө.
10-октябрдан бери күчүндө турган Газадагы ок атышууну токтотуу — АКШнын президенти Дональд Трамп сунуштаган 20 пункттук планга негизделген.
Ыктыярдуу өлкөлөрдөн түзүлө турган ISF, Израиль акырындык менен чыгып кеткенден кийин Газанын туруктуулугуна салым кошууну көздөйт.
Макулдашуунун биринчи этабы израилдик туткундардын палестиналык камактагылар менен алмаштырылуусун карайт, ал эми кийинки этаптар Газанын кайра курулушун жана Хамастын катышуусуз жаңы башкаруу механизмин түзүүнү көздөйт.
