Түркиянын президенти Режеп Таййип Эрдоган Израилдин экспансионисттик саясаты аймак үчүн эң чоң коопсуздук коркунучун жаратканын билдирди.
Бейшемби күнү Анкарада Алжирдин президенти Абдельмажид Теббун менен биргеликте өткөргөн басма сөз жыйынында Эрдоган: "Израилдин Газа, Батыш Шериа жана Ливандагы агрессиясы биздин аймак үчүн чыныгы коопсуздук көйгөйүнүн азыркы өкмөттүн мыйзамды жана тартипти этибарга албаган экспансионисттик саясаты экенин дагы бир жолу көрсөттү", - деди.
Эрдоган: "Түркия жана Алжир катары биз аймагыбыздын тынчтыгына жана коопсуздугуна олуттуу коркунуч келтирген зомбулук айлампасын токтотуу боюнча бирдей позициядабыз. Алжир менен бардык тармактарда өз ара пайдалуу мамиленин негизинде достугубузду жана кызматташтыгыбыздын өнүгүшүн улантабыз" деп кошумчалады.
Теббун да Израилдин аймактагы аракеттерин айыптады: "Биз эл аралык укукту бузган Израилдин оккупациясын, бир тууган Ливанга каршы ачык чабуулдарын жана Газадагы мыкаачылык чабуулдарын айыптайбыз" деди.
Кызматташтыкты чыңдоо
Эрдоган Теббун менен Президенттик резиденцияда жолугушту. Андан кийин лидерлер Жогорку деңгээлдеги стратегиялык кызматташтык кеңешинин жыйынына тең төрагалык кылышып, эки тараптуу келишимдерге кол коюу аземине катышышты.
Эрдоган Анкара Алжир менен энергетика, тоо-кен, транспорт жана айыл чарба сыяктуу стратегиялык тармактарда кызматташууну бекемдөөгө чечкиндүү экенин билдирди.
Түркиянын президенти эки өлкө тең энергетикалык камсыздоонун коопсуздугу, "айрыкча жаратылыш газы" боюнча узак мөөнөттүү кызматташуусун тереңдетүүнү улантып жатканын кошумчалады.
Теббун болсо Алжир менен Түркия экономикалык байланыштарын диверсификациялоого жана "жалпы тарыхый мурастарын" сактоого умтулаарын да айтты.
