АКШнын вице-президенти Ж.Д. Вэнс Пакистанда Иран менен сүйлөшүүлөрдө "чоң ийгиликтерге" жетишилгенин айтты, бирок Ормуз кысыгынын толугу менен ачылбашы сүйлөшүүлөрдүн жүрүшүн "түп-тамырынан бери" өзгөртүшү мүмкүн экенин эскертти.
Вэнс дүйшөмбү күнү Fox News каналына берген маегинде: " Баары жаман болуп жатат деп айта албайм. Менимче, жакшы нерселер да болду. Биз көп ийгиликтерге жетиштик", - деди."
Вэнс ошондой эле Вашингтон сүйлөшүүлөрдүн жүрүшүндө өзүнүн сүйлөшүү позициясын тактаганын, булардын арасында "Америка Кошмо Штаттарынын президенти жакшы келишимге жетишкенин сезиши үчүн сөзсүз түрдө көрүшү керек болгон элементтердин" да бар экенин билдирди.
Вэнс: "Эми негизги суроо ирандыктардын жетиштүү ийкемдүүлүгү барбы жана иштерди чечүү үчүн биз көрүшүбүз керек болгон чечүүчү пункттарды кабыл алабы", - деп кошумчалады.
АКШнын кызыл сызыктары тууралуу суроого Вэнс : "АКШнын президенти айткан эң негизги нерсе - Иран эч качан өзөктүк куралга ээ боло албайт. Ошондуктан, биздин бардык кызыл сызыктарыбыз ушул негизги принциптен келип чыгат",- деп жооп берди.
Вэнс АКШ Ирандан Ормуз кысыгын кайра ачуу боюнча кадамдарды жасоону улантарын күтүп жатканын айтып, муну дүйнөлүк экономикалык туруктуулук үчүн абдан маанилүү деп мүнөздөдү.
«Биздин күтүүбүз — ирандыктардын Ормуз кысыгын ачуу боюнча алга жылууну улантуусу. Эгер алар муну аткарбаса, бул жагдай алар менен жүргүзүп жаткан сүйлөшүүлөрүбүздү түп тамырынан бери өзгөртөт», — деп баса белгиледи Вэнс.
Топ алардын талаасында
Вэнс Вашингтондун Ирандын байытылган уран запасын чыгаруу жана Тегерандын өзөктүк куралды иштеп чыгуусуна жол бербөө үчүн катуу текшерүү чараларын камсыз кылуу сыяктуу негизги өзөктүк маселелерде "ийкемдүүлүгү жок" экенин баса белгиледи.
«Байытылган материалдар Ирандан тышкары чыгарылышы керек. Өзөктүк курал чыгарбай тургандыгы боюнча так убадаларын алышыбыз керек", — деген Вэнс, чечим кабыл алуу кезеги толугу менен Иран тарапта экенин кошумчалады.
Вэнс: "Ирандыктардын кандай сүйлөшкөнүнө байланыштуу айрым маалыматтарды агдык деп ойлойм жана Пакистандан чыгуубуздун себеби да ушул эле",- деди.
"Менин оюмча, ал жердеги команда диний лидерден же башка бирөөдөн биз койгон шарттар боюнча макулдук алуу үчүн Тегеранга кайтып кетүүгө аргасыз болду, анткени алар бир пикирге келе алышкан жок," - деп кошумчалады ал.
АКШ менен Иран дем алыш күндөрү Исламабадда түз сүйлөшүүлөрдү өткөрүштү, бирок бул сүйлөшүүлөр макулдашуусуз аяктады. Сүйлөшүүлөр ушул айдын башында жарыяланган эки жумалык ок атышуудан кийин болду.
Пакистандагы бул сүйлөшүүлөр, фундаменталдык пикир келишпестиктер чечилбегенине карабастан, 1979-жылдан берки АКШ менен Ирандын ортосундагы эң жогорку деңгээлдеги байланыш катары катталды.
