Түркия Республикасынын Тышкы иштер министрлиги АКШнын Ирандын өзөктүк объектилерине кол салуусунан терең тынчсыздануусун билдирип, бул абалдын аймактык кагылышууну глобалдык кризиске айландырышы мүмкүн экенин эскертти.
Жекшемби күнү жарыяланган билдирүүдө: «АКШнын 22-июнда Иран Ислам Республикасынын өзөктүк объектилерине кол салышы биз бир нече жолу баса белгилеген жаңжалдын күчөшү жана коопсуздук чөйрөсүн туруксуздаштыруу коркунучун максималдуу түрдө арттырды»,-деп айтылды.
Анкара Ирандын өзөктүк объектилерин бутага алган операциянын мүмкүн болуучу кесепеттерине «терең тынчсыздануусун» билдирип, «Бул окуялар аймактык талашты глобалдык масштабга алып чыгышы мүмкүн. Биз мындай катастрофалык сценарийдин болушун каалабайбыз» деп кошумчалады.
Түркия бардык тараптарды жоопкерчиликтүү иш-аракет кылууга жана «адамдардын өлүмүнө жана кыйроолоруна жол бербөө үчүн өз ара чабуулдарды токтоосуз токтотууга» чакырды.
Министрлик ошондой эле «Ирандын өзөктүк программасы боюнча талаш-тартышты чечүүнүн жалгыз жолу сүйлөшүү» экенин белгилеп, эл аралык коомчулукту тынчтык жолу менен чечүү үчүн дипломатиялык аракеттерди колдоого чакырды.
Билдирүүнүн соңунда: «Түркия өз милдеттерин аткарууга жана конструктивдүү салым кошууга даяр» делди.
БУУнун Коопсуздук Кеңеши АКШнын чабуулун айыптады
Анкаранын билдирүүсү АКШ Ирандын өзөктүк объектилерине, анын ичинде Фордо объектисине бункерди жарып өтүүчү бомбаларды жана канаттуу ракеталарды колдонуу менен чабуул жасагандан бир нече сааттан кийин жасалды.
АКШнын президенти Дональд Трамп жекшемби күнү америкалык күчтөр Ирандын үч өзөктүк объектисине абадан «абдан ийгиликтүү» сокку урганын жарыялады. Бул аймакта кеңири жаңжал чыгат деген кооптонууну жаратты.
АКШнын соккусунан кийин Иран БУУнун Коопсуздук Кеңешин чукул жыйынга чакырып, АКШнын агрессиясын айыптап, эл аралык мыйзамдарды бузгандарды жоопкерчиликке тартууну талап кылды.
Согуштук аракеттер 13-июнда Израиль Ирандын ар кандай объектилерине, анын ичинде аскердик жана өзөктүк объектилерге абадан сокку урганда башталган. Бул чабуулдар Тегерандын жооп кайтаруучу соккусуна алып келген.
Израиль бийликтери Ирандын ракеталык чабуулдарынан кеминде 25 киши каза таап, жүздөгөн адамдар жарадар болгонун билдирди.
Ал арада Ирандын Саламаттыкты сактоо министрлигинин маалыматы боюнча, Израилдин Ирандагы чабуулдарынан 430 адам каза болуп, 3500дөн ашууну жарадар болгон.
