АКШнын президенти Дональд Трамп ушул аптада Түркияда өткөрүлө турган Орусия-Украина тынчтык сүйлөшүүлөрүнүн маанисине токтолуп, сүйлөшүүлөрдөн «жакшы нерселер чыгышы мүмкүн» деген ойдо экенин айтты.
Трамп маалымат жыйынында: «Бейшемби күнү Орусия жана Украина менен өткөрүлө турган жыйын абдан маанилүү. Бул жыйындын өтүшүнө катуу талап койгом», – деди.
Сүйлөшүүлөрдүн жыйынтыгына оптимисттик көз карашта экенин билдирип: «Менимче, бул жыйындан жакшы нерселер чыгышы мүмкүн», – деди.
«Бейшемби күнкү жыйынга маани бергиле», – деген Трамп, Түркиянын президенти Режеп Таййип Эрдоганды «мыкты кожоюн» деп мактады.
"(Бейшемби күнү) Ошол учурда кайда болоорумду билбейм. Жакынкы Чыгыштын бир жеринде болом, бирок пайдалуу болоруна ишенсем, ал жакка (Стамбулга) учуп кете алам" деди.
Уланып жаткан жаңжалдын «ырайымсыз» адамдык чыгымдарына көңүл бурган Трамп муну «согуштун жаңы түрү» деп сыпаттады.
Трамп Украинадагы "үрөй учурган кан төгүүнү" токтотууга чакырып, «Экинчи Дүйнөлүк согуштан бери мындай деңгээлде адамдар өлтүрүлгөн эмес» деп айтты.
Тынчтык сүйлөшүүлөрү Түркиянын Стамбул шаарында өткөрүлүшү пландалууда. Украинанын президенти Владимир Зеленский Москванын узак тыныгуудан кийин тынчтык сүйлөшүүлөрүн кайра баштоо сунушун кабыл алганын билдирди.
Эрдоган Орусиянын президенти Владимир Путиндин 2022-жылдын март айында Стамбулда токтогон процессти кайра баштоо боюнча колдоосун кубаттап, Түркиянын тынчтык аракеттерине берилгендигин дагы бир жолу тастыктады.
