Шейшемби күнү жетекчилер, Индиянын түштүк штаты Теланганадагы дары-дармек чыгаруучу заводдо дүйшөмбү күнү болгон чоң жарылуу жана өрттөн каза болгондордун саны 36га жетип, 30га жакын адамдын да жаракат алганын билдиришти.

Өрт өчүрүүчүлөр, штаттын борбору Хайдарабаддан 50 чакырым алыстыкта ​​жайгашкан өнөр жай объектисинде болгон кырсыктан кийин 34 жумушчунун күйүп калган сөөгүн табышты. Телангананын өрт кызматынын директору Г.В. Нараяна Рао Associated Press агенттигине маалыматты тастыктады.

Раонун айтымында, дагы эки жумушчу күйүктөн улам ооруканада каза болду. Ошондой эле, өрттөн жабыркаган Sigachi Industries фармацевтикалык заводунун калдыктары дагы деле тазаланып жатканын, ичинде башка жумушчулар калып же калбаганы текшерилгенин айтты.

Жаракат алган отузга жакын жумушчу ооруканаларга жеткирилгенин кошумчалаган Рао"Заводдун бүтүнүдөй структурасы урап калды. Өрт өчүрүлдү жана калдыктарды алдыдагы бир нече саатта толугу менен жок кылабыз деп үмүттөнөбүз" деди.

Sigachi Industries компаниясы жарылуу жана өрттүн себеби тууралуу маалымат берген жок, бирок заводдун негизги өндүрүш инфраструктурасы бузулганын жана ишкананын иши 90 күнгө токтотуларын билдирди. Компаниянын айтымында, бул завод дары-дармек өндүрүшүндө кеңири колдонулган микрокристаллдык целлюлоза химиялык кошулмасын чыгарат.