Киев тарабынан жарыяланган бир тараптуу ок атышууну токтотуу режими шаршемби күнү күчүнө кириши күтүлүп жаткан маалда, Украина Россияны өлкө боюнча чабуулдарын күчөткөндүгү үчүн айыптады. Запорожье облусунун жетекчилиги Москванын эртең менен инфраструктуралык объекттерге сокку урганын кабарлады.

Бул аптада Москва да, Киев да ар башка даталар үчүн бир тараптуу ок атышууну токтотууну жарыялашты. Россия ок атышууну токтотуу режимин 9-майда Экинчи дүйнөлүк согуштагы Жеңиш күнүн майрамдоого дал келишин талап кылса; Зеленский Москвадан кагылышууларга тыныгуу берүүнү талап кылып, ошол эле учурда өлүмгө алып келген чабуулдарды жасаганы үчүн «накта эки жүздүүлүк» деп айыптады.

Оор жоготуулар

Украинанын ички иштер министри Игорь Клименко Киевдин ок атышууну токтотуу режиминин алдында Полтава, Харьков, Донецк, Днепр, Запорожье, Херсон, Одесса, Чернигов жана Сумы облустарында уюштурулган Россиянын чабуулдарында 27 адам каза болуп, кеминде 120 адам жаракат алганын билдирди. Краматорск шаарынан келген акыркы маалыматтар менен каза болгондордун саны 28ге жетти.

Кол салуулардын чоо-жайы:

Запорожье: 12 жай тургун каза болду. Зеленский кол салуунун "аскердик жактан акталбаганын" билдирди.

Краматорск: Шаардын борборуна жасалган чабуулда алты адам каза болду.

Днепр: Төрт жай тургун каза болду.

Крым: Орус жетекчилер Украинага таандык дрондор менен жаслаган кол салууда беш жарандын каза болгонун жарыялады.

Украинанын тышкы иштер министри Андрей Сибига X аркылуу билдирүүсүндө: "Ок атышууну токтотуу күчүнө кире турган сааттарда Россиянын токтоо ниети жок; тескерисинче, Москва террорун күчөтүп жатат", - деп билдирди.

Дипломатиялык байланыштар

Чабуулдар акыркы жумалардагы эң кандуу окуялар катары катталып, дипломатиялык каналдарда күтүүсүз өзгөрүү болду. АКШнын мамлекеттик катчысы Марко Рубио орус кесиптеши Сергей Лавров менен, Лавровдун өтүнүчү боюнча телефон аркылуу сүйлөштү. АКШнын Мамлекеттик департаменти сүйлөшүүдө АКШ-Россия мамилелери, Украинадагы согуш жана Иран маселелери талкууланганын билдирди, бирок деталдуу маалымат бөлүшкөн жок.