Россия Украинага аба соккуларын кайра баштап, Пасха майрамына карата түзүлгөн келишимди чукул токтотту. Россиянын президенти Владимир Путин Киевдин жарандык объектилерге кол салууларды бир айга токтотуу сунушуна этият мамиле жасоодо.
Дүйшөмбү күн жасалган жаңы кол салуулар АКШнын президенти Дональд Трамптын тараптардын ортосунда кеңири ок атышпоо келишими түзүлөт деген үмүтүн жокко чыгарды. Трамп бир нече саат мурун бул аптада "келишим" түзүлүшү мүмкүн экендигин айткан.
Путин мамлекеттик телеканалга жасаган билдирүүсүндө : “Аскердик аракеттер кайра башталды”,- деди. Бул сөздөр украиналык жетекчилер ишке ашырылган 30 сааттык ок атышпоодон кийин түнү менен учкучсуз учуучу аппараттар жана артиллериялык кол салуулардын болгонун билдиргенден кийин келди.
Эки тарап тең Путин ишемби күнү жарыялаган ок атышпоо учурунда миңдеген эреже бузуунун болгондугун билдиришти.
Путин Украинанын эреже бузууларын тизмелегенден кийин : «Бирок жалпысынан мындай аракеттерде азаюу болду. Муну ыраазычылык менен кабыл алабыз жана келечекке кароого даярбыз»,- деди.
Украинанын президенти Владимир Зеленский болсо ок атышпоону ыраазычылык менен кабыл алгандарын бирок Украина армиясынын Россиянын аткарган кыймылы менен «симметриялуу» жооп кайтара тургандыгын эскертти.
Зеленский өзгөчө жаңы бир ок атышпоо сунушун билдирди: кеминде 30 күн узун аралыктуу учкучсуз учуучу аппараттар жана ракеталар менен жарандык структурага карата бардык кол салуулардын токтотулушу.
Зеленский «так жооп» күтүп жатат
Путин бул сунушту «талкуулаша тургандарын» айтты бирок Украинаны ресторандар менен университет сыяктуу жарандык имараттарды аскердик максатта колдонуу менен айыптады. Орус лидер 13 - апрелде Сумы шаарында бир университет имаратынын Украина тарабынан аскердик сыйлык тапшыруу аземи үчүн колдонулгандыгын айтты.
Путин университетке шилтеме жаса: «Бул жарандык объектби же жокпу? Бирок режим бул жарандык объектилерди колдонууда. Бул теманы такташыбыз керек»,- деди. Өзгөчө бул тема тууралуу Украина менен эки тараптуу сүйлөшүүлөрдү мүмкүнчүлүктөрдүн ичинде көргөндүгүн да белгилеп: «Баарын анализдеп ошого жараша чечим чыгарабыз»,- деди орус лидер.
Зеленский дүйшөмбү күнү кечки сааттарда ок атышпоо сунушуна «так жооп» бериши үчүн Россияга чакырык салып: «Украина жок дегенде жарандык структурага кол салбоо сунушун улантууда. Москвадан так жооп күтүп жатабыз. Бул үчүн бардык сүйлөшүүлөргө ачыкпыз»,- деди.
Зеленский шаршемби күнү Украина делегациясынын ок атышпоо сүйлөшүүлөрү үчүн Британия, Франция жана АКШ менен Лондондо жолугушарын жарыялады.
«Колубуздан келишинче конструктивдүү кадамдарга барууга даярбыз», - деп кошумчалады.
Трамптын "үмүттөрү"
Путиндин ок атышпоо тууралуу жарыясы Трамп жума күнү жасаган жана эгер эки тарапта тең өзгөрүү болбосо АКШнын согушту токтотуу аракеттерин акырына чыгагарын белгилеген билдирүүсүнөн кийин келди.
АКШнын президенти жекшемби күнү эки тарап тез арада келишимге келе алат деген үмүтүн билдирип, бирок кененирээк маалымат берген жок.
“Россия менен Украина ушул жумада келишим түзөт деп үмүттөнөм", - деп билдирген Truth Social платформасында.
Өткөн айда Трамп толук жана шартсыз ок атышууну токтотуу сунушун киргизген жана Украина кабыл алган, бирок Путин четке каккан.
Кремлдин басма сөз катчысы Дмитрий Песков Трамптын дүйшөмбүдөгү билдирүүсү тууралуу суроого жооп берип, Москванын АКШнын аракеттеринин “жыйынтык береринен үмүттүү” экендигин айтты бирок сүйлөшүүлөрдүн графиги боюнча маалымат берүүдөн баш тартты.
