Россиянын президенти Владимир Путин менен АКШ президенти Дональд Трамптын атайын өкүлү Стив Виткофф Украинадагы согушту токтотуу аракеттерин талкуулоо үчүн Санкт-Петербургда жолугушту.
Жолугушуунун басма сөзгө ачык бөлүгүндө сөз сүйлөгөн Путин Трампка Украинадагы кризисти чечүүгө кызыкдар болгону үчүн ыраазычылык билдирип, АКШнын президенти бул маселеге гуманитардык себептерден улам өзгөчө маани берерин белгиледи.
Путин Россиянын АКШ менен эки тараптуу карым-катнаштарды, айрыкча экономикалык кызматташтыкты калыбына келтирүүгө кызыкдар экенин билдирди.
Ирандагы абалдар тууралуу АКШнын көз карашын билгиси келерин белгилеген орус лидери өлкөсүнүн Иран менен ондогон жылдардан бери өзгөчө мамиледе экенин белгиледи. Путин Москванын кагылышууну жөнгө салууга салым кошууга даяр экенин кошумчалады.
Путин бул жана башка эл аралык маселелер чечүүнү талап кыларын белгилеп, ыктымалдуу сүйлөшүүлөр боюнча Москванын да бөлүшкүсу келген пикирлери бар экенин билдирди.
Ошондой эле Владимир Путин Россиянын АКШга дизель отунун жеткирүү чечиминен кийин дүйнөлүк рыноктордо баалар 5–6 пайызга төмөндөгөнүн белгилеп, өлкөсү АКШга ири көлөмдө жер семирткич жеткирүүгө да даяр экенин айтты.
Виткофф Путинге Украина үчүн жаңы тынчтык сунуштарын сунуштады
Стив Виткофф кечээ Ослодо Украина жана Европа өкүлдөрү менен өткөрүлгөн сүйлөшүүлөрдүн конструктивдүү өткөнүн жана прогресске жетишилгенин белгилеп, Украинада ок атышууну токтотуу үчүн зарыл шарттар түзүлгөнүн билдирди.
Украинадагы кагылышууну жөнгө салуунун ар кандай жолдорун камтыган документтерди Путинге алып келгенин айткан Виткофф: «Бул документтерди кийинчерээк карап чыгууну суранам», — деди.
АКШнын өкүлү Вашингтондун Россия, АКШ жана Украинанын ортосундагы үч тараптуу сүйлөшүүлөрдүн кайра башталышынан үмүттүү экендигин билдирип, Путинден техникалык эксперттер кагылышууну жөнгө салуу процессинин чоо-жайын талкуулай турган сүйлөшүүлөрдү кайра баштоо мүмкүнчүлүгүн карап чыгууну өтүндү.
