Ватикандын жогорку дипломатиялык кызматкери кардинал Пьетро Паролин АКШнын президенти Дональд Трамптын "Тынчтык кеңеши" демилгесине катышпай турганын айтты; Паролин ошондой эле кризистик кырдаалдарды башкаруу Бириккен Улуттар Уюмуна калтырылышы керектигин кошумчалады.
Шейшемби күнкү билдирүүсүндө Паролин: "Ватикан берки мамлекеттердин мүнөзүнө туура келбеген өзгөчөлүгүнөн улам Тынчтык кеңешине катышпайт", - деди.
Паролин: "Биздин тынчсыздануубуз - эл аралык деңгээлдеги бул кризистик кырдаалдарды биринчи кезекте Бириккен Улуттар Уюму башкарышы керек. Бул биз талап кылган пункттардын бири", - деп билдирди.
Январь айында биринчи америкалык Рим папасы жана Трамптын айрым саясатын сынга алган Рим Папасы Лео кеңешке кошулууга чакырылган.
Октябрда ок атышууну токтотууга алып келген Трамптын Газа планынын алкагында кеңеш Газанын убактылуу администрациясын көзөмөлдөө үчүн түзүлгөн. Кийинчерээк Трамп кеңешти глобалдык чыр-чатактарды чечүү үчүн кеңейтерин, ага өзү төрагалык кыларын айтты. Кеңеш бейшемби күнү Вашингтондо Газаны калыбына келтирүү маселесин талкуулоо үчүн биринчи жыйынын өткөрөт.
Тынчтык Кеңеши Европа, Жакынкы Чыгыш, Чыгыш Азия жана Латын Америкасындагы АКШнын жакын өнөктөштөрүнөн турат. Италия жана Европа Биримдиги Кеңештин мүчөлөрү болбогондуктан өз өкүлдөрүн байкоочу катары катыштырууну пландап жатышканын билдиришти.
Мексика толук мүчөлүктөн баш тартууда
Ошол эле учурда шейшемби күнү Мексиканын президенти Клаудия Шейнбаум Тынчтык кеңешинде палестиналык өкүлү жок болгондуктан Газа тилкесиндеги ок атышпоо планын көзөмөлдөгөн АКШнын лидерлигиндеги бул топко толук кандуу мүчө катары кошулбай турганын айтты.
Басма сөз жыйынында "Биз Палестинаны мамлекет катары тааныгандыктан, Израиль менен Палестинанын катышуусу маанилүү. Кеңеш мындай түзүлүшкө ээ эмес", - деди.
Шейнбаум өз өлкөсү Бириккен Улуттар Уюмуна элчисин байкоочу катары жөнөтөрүн кошумчалап, "Алар бизди байкоочу катары катышууга чакырышты; эгер биз катышпай турган болсок, бизден байкоочу катары катышууну суранышты. Тышкы иштер министри менен биргеликте Бириккен Улуттар Уюмундагы элчибиз байкоочу катары катышат деп чечтик", - деди.
Шейнбаум Израилдин Газага жана Палестина элине карата уланып жаткан чабуулдарын геноцид деп мүнөздөп, Палестинаны колдогонун жана эки мамлекеттүү чечимге чакырганын айтты.
