АКШнын аскер күчтөрү Жакынкы Чыгыштагы айрым базалардан учактар менен кемелерди Ирандын мүмкүн болуучу чабуулуна дуушар болуу коркунучунан улам көчүрдү, деп шаршемби күнү эки АКШ расмий өкүлү Reuters агенттигине билдиришти.
Бул кадамдар АКШ президенти Дональд Трамптын Ирандын өзөктүк жана ракеталык объекттерине Израилдин аба чабуулдарына кошулабы же жокпу деген суроону ачык калтырган учурда жасалды. Ал эми аба чабуулдарынын алтынчы күнүндө Ирандын борборунун тургундары качып чыгууга аргасыз болушту.
Башка жагынан алганда, АКШнын Катардагы элчилиги бейшемби күнү өз кызматкерлерине жана жарандарга Доханын четиндеги чөлдө жайгашкан Жакынкы Чыгыштагы эң чоң АКШ аскер базасы болгон Аль-Удейд аба базасына убактылуу барууга чектөө киргизген эскертүү таратты.
Элчилик аймактагы учурдагы чыңалган кырдаалды эске алып, сактык чараларын күчөтүү керектигин АКШ жарандарына жана кызматкерлерине эскертти.
Аты-жөнүн атагысы келбеген эки АКШ расмий өкүлү бул көчүрүү чаралары АКШ күчтөрүн коргоо планынын бир бөлүгү экенин, бирок канча техника жана кайсы жерлерге көчүрүлгөнүн ачыктаган жок.
Расмий өкүлдөрдүн бири Аль-Удейд базасында корголбогон баш калкалоочу жайларда турган учактар көчүрүлгөнүн, ошондой эле Бахрейндеги АКШнын 5-флоту жайгашкан порттон аскердик кемелердин чыгарылганын билдирди.
“Бул кадимки эле практика,” – деп кошумчалады расмий өкүл. “Күчтөрдү коргоо – башкы приоритет.”
АКШнын аскердик техникалары Жакынкы Чыгышка көчүрүлдү
Reuters агенттиги бул жумада бир катар танкер учактар Европага, ал эми башка аскердик техникалар Жакынкы Чыгышка, анын ичинде кошумча согуштук учактар жөнөтүлгөнүн кабарлады.
Индо-Тынч океан аймагындагы бир учак конуучу кемеси дагы Жакынкы Чыгышка багыт алды.
Израиль жума күнү Иран өзөктүк курал жасоонун босогосунда турат деген бүтүмгө келип, аба согушун баштаган.
Иран өзөктүк курал жасоону көздөбөйт деген дооматтарды четке кагууда.
Ирандын Женевадагы БУУдагы элчиси шаршемби күнү Вашингтонго эгерде АКШ Израилдин аскердик кампаниясына түздөн-түз катышса, Иран катуу жооп кайтарарын билдирди.
