Түндүк Кипр Түрк Республикасынын (ТКТР) жарандары жекшемби күнү президенттик шайлоонун биринчи айлампасына добуш берүү үчүн шайлоо участкаларына барат..
ТКТРде 218 313 шайлоочунун добуш берүү укугу бар жана алар сегиз талапкердин бирине добуш берет.
Учурдагы президент Эрсин Татар көз карандысыз талапкер катары ат салышса, негизги оппозициялык Республикалык Түрк партиясынын (CTP) лидери Туфан Эрхүрман партиясынын талапкери катары шайлоого катышууда.
Биринчи айлампада Хүсейин Гүрлек, Мехмет Хасгүлер, Ариф Салих Кырдаг, Ахмет Боран жана Ибрахим Языжы көз карандысыз талапкерлер катары, ал эми Осман Зорба Кипр Социалисттик Партиясынын атынан шайлоого катышууда.
Биринчи айлампада талапкер жалпы добуштардын 50 пайызынан ашыгын алса (абсолюттук көпчүлүк), президент болуп шайланат.
Эгерде эч бир талапкер абсолюттук көпчүлүккө жетпесе, биринчи айлампада эң көп добуш алган эки талапкер экинчи айлампага өтөт. Экинчи айлампа жети күндүн ичинде өткөрүлөт.
Экинчи айлампада эң көп добуш алган талапкер президенттик орундукка отурат.
Талапкерлер шайлоо өнөктүгүн ишемби күнү жергиликтүү убакыт боюнча саат 18:00дө (1500GMT) шайлоо мыйзамына ылайык тыюу салынганга чейин уланта алышат.
Эрсин Татар кайра шайланууну максат кылууда
ТКТРдин президенти элдик добуш берүү аркылуу ар беш жылда шайланат жана мөөнөт чектөөсү жок.
Өлкөнүн негиздөөчүсү жана биринчи президенти Рауф Раиф Денкташ 1985-жылдан 2005-жылга чейин ТКТРди жетектеген жана бардык шайлоолорго көз карандысыз талапкер катары катышкан.
2000-жылы Улуттук Биримдик Партиясынын (УБП) талапкери Дервиш Эроглу жарыштан чыгышы менен Денкташ бир гана талапкер катары кайрадан президент болуп шайланган. Денкташ 2005-жылдагы президенттик шайлоого катышкан эмес.
2005-жылы РТПнын талапкери Мехмет Али Талат 55,59 пайыз добуш менен президент болуп шайланган.
2010-жылы УБПнын талапкери Дервиш Эроглу 50,35 пайыз добуш менен президенттикке жетишкен.
2015-жылы Мустафа Акынжы өлкөнүн төртүнчү президенти болуп шайланса, учурдагы президент Эрсин Татар 2020-жылы бешинчи президент болуп шайланган.
