АКШлык бир жетекчи Израиль менен Ливандын ортосунда мөөнөтү аяктап жаткан ок атышпоого байланыштуу сүйлөшүүлөрдүн “оң” өткөнүн; экинчи күндүн да пландалгандай өтөөрүн белгиледи.
АКШ мамлекеттик департаментинин жогорку даражалуу өкүлү: "Эртең мененки саат 9дан кечки 5ке чейин (Гринвич боюнча 13:00-21:00) созулган натыйжалуу жана позитивдүү сүйлөшүү күнүн өткөрдүк. Жума күнү да ушундай уланышын күтөбүз жана бөлүшө турган маалыматтар көп болот деп ойлойбуз", — деп билдирди.
Эки өлкө тең тынчтык сүйлөшүүлөрүнө даярдык көрүү кадамы катары 14-апрелде жана 23-апрелде өткөрүлгөн алгачкы эки айлампадан кийин, Вашингтондогу Мамлекеттик департаменттин башкы кеңсесинде сүйлөшүүлөрдү башташты.
Ливандык расмий өкүлдөрдүн маалыматына ылайык, 2-марттан бери Израилдин ылгабай жасаган чабуулдарынан улам 2 896дан ашык адам каза болуп, 8 824төн ашууну жаракат алган. Ошондой эле 1,6 миллиондон ашык киши үй-жайын таштап кетүүгө мажбур болгон, бул өлкө калкынын болжол менен бештен бирине туура келет.
Израиль армиясы күн сайын Ливанга карата кол салууларын улантып, 17-апрелде жарыяланган жана кийинчерээк 17-майга чейин узартылган ок атышууну токтотуу келишимин тынымсыз бузууда.
Израиль кайрадан ливандыктарды өлтүрдү
Вашингтондо расмий өкүлдөр жолугушуп жаткан учурда Израилдин согуштук учактары Ливандын түштүгүндө үч адамды өлтүрдү.
Улуттук жаңылыктар агенттиги (NNA) Израилдин согуштук учагы Тирдин Шрифа шаарындагы Эззедин турак жай комплексине кол салып, эки адамдын өмүрүн алганын билдирди.
Ошондой эле агенттик турак жай комплекси толугу менен талкалангандан кийин, Ислам Рисала скауттар ассоциациясынын куткаруучу топтору урандылардын астынан эки адамдын сөөгүн алып чыкканын билдирди.
NNAнын маалыматы боюнча, Зрарие шаарында Израилдин башка бир чабуулунда бир адам каза болуп, эки адам жаракат алган.
Ошол эле шаарда жарандык коргонуу постуна жасалган чабуулда эки фельдшер жаракат алган; ал эми Кфар Мелки шаарында дагы бир чабуулда үч адам жаракат алган.
Израилдин согуштук учактары ошондой эле Ливандын чыгышындагы Бекаа аймагындагы Айн аль-Тинех, Яхмар, Лубая жана Сохмор шаарларына чабуул жасады.
