Түндүк Кипр Түрк Республикасынын президенти Туфан Эрхүрман президент Режеп Таййип Эрдогандын Чыгыш Жер Ортолук деңизи жана Кипр боюнча билдирүүлөрүн колдой турганын билдирди. Эрхүрман Кипр түрк элин жана Түркияны коопсуздук, энергетика жана деңиз юрисдикциясы сыяктуу маселелерден четтетүү аракеттери эч качан ийгиликке жетпей турганын баса белгиледи.
Президент Эрдогандын: "Эгерде Түркиянын жана Кипр түрктөрүнүн укуктары менен кызыкчылыктары Чыгыш Жер Ортолук деңизинде бутага алынса, биздин жообубуз абдан так жана бекем болору билинишин каалайм,-" деген билдирүүсүнө баа берген Эрхүрман бейшемби күнү жасаган билдирүүсүндө бул сөздөрдү абдан орундуу жана так деп мүнөздөдү.
"Дипломатияны Кипр түрк элинин пайдасы үчүн колдонуп жатабыз"
"Президенттикте 200 күн" аттуу басма сөз жыйынында сөз сүйлөгөн Эрхүрман өз администрациясынын ишмердүүлүгү тууралуу айтып, Кипрдеги жана Чыгыш Жер Ортолук деңизиндеги акыркы окуяларга токтолду.
Анталья дипломатия форумуна жана Казакстандагы Түрк мамлекеттер уюмунун (ТМК) жыйындарына Кипр түрк элинин пайдасына дипломатиялык каналдарды колдонуу үчүн катышканын билдирген Эрхүрман: "Коопсуздук, энергетика жана деңиз юрисдикциясы маселелеринде Кипр түрк элин жана Түркия Республикасын четтетүүгө же четке кагууга багытталган эч бир кадам натыйжа бере албайт", - деди.
«Сүйлөшүүлөр жөн гана сүйлөшүү үчүн жүргүзүлбөйт»
Кипр маселесинде Түркия менен дайыма кеңешип турушканын белгилеген Эрхүрман, Кипр түрк эли маселени чечүү багытындагы күчтүү эркин сактап жатканын баса белгиледи. Кипрдеги сүйлөшүүлөр жөн гана "сүйлөшүү жүргүздүк" деш үчүн жүргүзүлбөгөгүнө көңүлдөрдү бурган Эрхүрман, Бириккен Улуттар Уюму жана Кипрдин грек администрациясы (Рум башкаруусу) менен өткөрүлгөн жолугушуулар тууралуу коомчулукка маалымат берилип турарын айтты.
Түркиянын Улуттук Коргоо министрлиги: "Ийгиликке жетүү мүмкүнчүлүгү жок"
Түркия Республикасынын Улуттук коргоо министрлиги (MSB) бейшемби күнү Түркия менен Түндүк Кипр Түрк Республикасынын (ТКТР) укуктарын жана кызыкчылыктарын бутага алган эч бир аскердик альянстын ийгиликке жетүү мүмкүнчүлүгү жок экенин баса белгиледи.
Бул билдирүү ушул аптада Кипрдин грек администрациясы (GCA) менен Франциянын ортосунда кол коюлган, аскердик кызматташтыкты жана француз аскерлерин Түштүк Кипрге жайгаштырууну камтыган Күчтөрдүн статусу жөнүндө келишимге (SOFA) жооп катары жасалды.
Министрлик Түрк куралдуу күчтөрүнүн (TSK) кипрлик түрктөрдүн коопсуздугуна коркунуч келтирген ар кандай душмандык аракеттерге "катуу жооп" бере ала турган күчүнүн бар экенин жана чечкиндүү экенин билдирди.
"Франция менен Кипр Республикасынын ортосундагы келишим эл аралык укукка каршы"
Улуттук коргоо министрлиги Чыгыш Жер Ортолук деңизиндеги туруксуздукту бузууга жана чыңалууну күчөтүүгө багытталган провокациялар тыкыр көзөмөлдөнүп жатканын билдирип, төмөнкүдөй билдирүү жасады: "Кипрде гарант статусуна ээ болбогон Франция менен аралдагы назик тең салмактуулукту бир тараптуу өзгөртүүнү көздөгөн жана кипрлик түрктөрдүн эркин жана эгемендүү теңдик укуктарын этибарга албаган Грек Кипр администрациясынын ортосунда кол коюлган бул келишим 1960-жылдагы Кипр келишимдерине жана эл аралык укукка карама-каршы келет".
