Бириккен Улуттар Уюму АКШнын Венесуэладагы кийлигишүүсүнө терең тынчсыздануусун билдирип, мунун эл аралык укуктун негизги принцибин "ачыктан-ачык бузганын" эскертти.

БУУнун Адам укуктары боюнча кеңсесинин басма сөз катчысы Равина Шамдасани шейшемби күнү Женевада журналисттерге маалымат берип жатып "Эч бир мамлекет башка мамлекеттин аймактык бүтүндүгүнө же саясий көз карандысыздыгына коркунуч келтирбеши же күч колдонбошу керек", - деди.

Анын билдирүүсү Венесуэланын президенти Николас Мадуро жана жубайы Силия Флорес ишемби күнү эртең менен АКШнын атайын күчтөрү тарабынан согуштук учактардын абадан сокку уруулары жана деңиз флотунун жайгаштырылышынын колдоосунда уурдалгандан кийин айтылды.

Шамдасани рейдди негиздеген АКШнын «Венесуэла өкмөтүнүн узак убактан бери болуп келген жана кабатырландыруучу адам укуктарынын бузулуштары» деген жүйөлөрүн четке какты.

БУУнун өкүлү: "Адам укуктарын бузуу үчүн жоопкерчиликти эл аралык укукту бузган бир тараптуу аскердик кийлигишүү аркылуу алууга болбойт", - деди.

Адам укуктары боюнча кеңсе он жылдан бери Венесуэладагы кырдаал "тынымсыз начарлап баратат" деп үзгүлтүксүз билдирип келгенин баса белгилеген Бириккен Улуттар Уюмунун Адам укуктары боюнча кеңсесинин өкүлү Равина Шамдасани: "АКШнын кийлигишүүсү жана өлкөдөгү милитаризациялоодон улам келип чыккан азыркы туруксуздук кырдаалды ого бетер начарлатарына тынчсызданып жатабыз", - деди.