БУУнун Башкы ассамблеясы шейшемби күнү Украинада ар тараптуу, адилеттүү жана туруктуу тынчтыкты орнотууга чакырган резолюциянын долбоорун кабыл алды. Добуш берүүдө Россия каршы добуш берсе, АКШ калыс калды.

Резолюциянын долбоору 107 «макул», 12 «каршы» жана 51 «калыс» добуш менен кабыл алынды.

Украина тарабынан сунушталган жана 46 өлкө колдогон резолюцияда согуштун аймактык жана глобалдык кесепеттери баса белгиленип, Россиянын «жарандарга, жарандык объекттерге жана маанилүү энергетикалык инфраструктурага» жасаган чабуулдарынын уланып жатышына жана гуманитардык абалдын начарлашына байланыштуу «олуттуу кооптонуу» билдирилди.

Резолюциянын долбоорунда Башкы ассамблеянын Украинанын эгемендигине, көз карандысыздыгына, биримдигине жана аймактык бүтүндүгүнө анын ичинде аймактык сууларына болгон чечкиндүү колдоосу дагы бир жолу тастыкталды.

«Тез арада, толук жана эч кандай шартсыз ок атышууну токтотууга» чакырган резолюциянын долбоору ошол эле учурда «ишенимди бекемдөөчү негизги чаралар катары согуш туткундарын толук алмашууну, мыйзамсыз кармалган бардык адамдарды бошотууну жана мажбурлап көчүрүлгөн же депортацияланган жарандардын, анын ичинде балдардын кайтып келишин» талап кылды.

Ошол эле учурда, АКШ резолюциянын бир бөлүгүн калган бөлүгүнөн бөлүп, аны башка добушка коюу сунушун киргизди.

Украинанын тышкы иштер министринин орун басары Мариана Бетса бул сунушка катуу каршы чыгып, мунун «терең кооптондуруучу жана кабыл алынгыс» деп мүнөздөдү.

Американын БУУдагы өкүлү Тэмми Брюс болсо: "Биздин оюбузча, резолюциядагы айрым сөздөр туруктуу тынчтыкка алып баруучу дипломатиялык жолдордун бардыгын талкуулоону колдоонун ордуна, көңүлдү уланып жаткан сүйлөшүүлөрдөн алаксытышы мүмкүн", - деди.