Түрк кызматташтык жана координация агенттиги (ТИКА) тарабынан даярдалган гуманитардык жардам пакеттери Каракастагы Түркия элчилигинин координациясында жер титирөөдөн эң көп жабыркаган Ла-Гуайра шаарындагы Хосе Мария Варгас спорт комплексинде Венесуэла бийлигине жеткирилди.

Болжол менен 5000 адамга жетүши максатталган жардам пакеттеринин ичинде беш кишиден турган үй-бүлөгө 15 күнгө жете турган май, күрүч, макарон жана печенье сыяктуу негизги азык-түлүктөр, ошондой эле гигиеналык каражаттар бар.

Түркиянын Каракастагы элчиси Нажи Айдан Караманоглу Түркиянын жер титирөөдөн кийин Венесуэла менен тилектештиги бир гана билдирүүлөр менен чектелбестигин жана 75 кишиден турган түрк издөө-куткаруу тобу аймакта ишин улантып жатканын билдирди. 6-февралдагы жер титирөөлөр учурунда Венесуэланын Түркияга көрсөткөн колдоосун эске салган Караманоглу ТИКА, AFAD (Түркиянын кырсыктарды жана өзгөчө кырдаалдарды башкаруу башкармалыгы) жана Түрк Кызылайынын алдыдагы мезгилде гуманитардык жардам көрсөтүүнү улантаарын билдирди.

Венесуэланын тышкы иштер министринин орун басары Оливер Бланко Түркияга ыраазычылык билдирип, жер титирөөдөн кийин Түркия өкмөтү издөө-куткаруу тобун жөнөткөнүн жана түрк топтору аймакта үмүт булагы болорун айтты. Бланко оор шарттарда түрк элинин Венесуэлага сунган жардамын унутпай турганын баса белгиледи.

Ла-Гуайранын губернатору Хосе Алехандро Теран дагы эл аралык тилектештикке ыраазычылык билдирип, издөө-куткаруу топтору маанилүү колдоо көрсөткөнүн жана урандылардын астынан куткарылгандардын үмүт бергенин билдирди. Теран: "Чыныгы достук ушундай учурларда ачыкка чыгат", - деди.