Түркиянын тышкы иштер министри Хакан Фидан Исламабадга жасаган расмий сапарында түрк фирмаларынын Пакистан жээктеринде мунай жана жаратылыш газын чалгындоо иштерин жүргүзө турганын билдирди.
Шаршемби күнү Пакистандын вице-премьер-министри жана тышкы иштер министри Мухаммед Исхак Дар менен биргелешкен маалымат жыйынында сөз сүйлөгөн Фидан Анкаранын Исламабад менен өзгөчө стратегиялык тармактарда экономикалык жана энергетикалык карым-катнаштарын тереңдетүү ниетин баса белгиледи.
“Түркия менен Пакистан эки тараптуу соода көлөмүн 5 миллиард долларга жеткирүү үчүн иштеп жатышат,” - деген Фидан “Тоо-кен, мунай, жаратылыш газы жана сейрек кездешүүчү элементтер сыяктуу негизги тармактарда да кызматташтык механизмдерин баалоодобуз” деп айтты.
Фидан апрель айында Түркиянын Мунай Корпорациясы (TPAO) менен Пакистандын улуттук мунай компанияларынын ортосунда кол коюлган энергетикалык келишимди эки тараптуу кызматташтыкты кеңейтүүдө “өтө маанилүү кадам” катары мүнөздөдү.
Бул келишимдин негизинде түрк жана пакистандык фирмалар Пакистандын деңиз аймактарында биргелешкен мунай жана газ чалгындоо иштерин жүргүзө алышат. Бул Түркия-Пакистан энергетика кызматташтыгынын тарыхында болуп көрбөгөндөй кадам болуп саналат.
Өнөктөштүктү бекемдөө
Исхак Дар Исламабад менен Анкаранын экономика, коргоо өнөр жайы, энергетика, инфраструктура сыяктуу ар түрдүү тармактарда кызматташтыкты дагы да бекемдөөгө макулдашканын айтты.
Түрк коргоо өнөр жайын мактаган Дар, Исламабаддын стратегиялык жана коргонуу өнөр жайы боюнча учурдагы кызматташтыкты дагы да күчтөндүрүүнү жана аймакта тынчтык менен ырааттуулукту шыктандырууну каалаганын баса белгиледи.
Эки тараптын терроризмге каршы күрөшүүдө потенциалды арттыруу сыяктуу ар түрдүү иш-аракеттерге “активдүү” катышып жатканын айткан Дар, түрк компаниялары энергетика секторундагы бөлүштүрүү компанияларын менчиктештирүү иштерине да катышарын кошумчалады.
Атайын экономикалык зона
Дар, эки тараптын түрк ишкерлери үчүн Карачи жана Стамбулда атайын экономикалык аймак түзүүнү көздөп жатканын айтып: “Кемелерди демонтаждоо жана сактоо, ошондой эле айыл чарба суусун натыйжалуу пайдалануу сыяктуу тармактарда түрк тажрыйбасынан жана адистигинен пайда көрүү үчүн активдүү иштеп жатабыз,” - деди.
Исламабад менен Анкаранын 11 жылдык арадан кийин биргелешкен министрлер комиссиясын кайра жандандырууга макулдашканын, аны Пакистандын соода министри Жем Кемал менен Түркиянын коргоо министри Яшар Гүлер жетектей турганын билдирди.
Дар: “Бул иштердин баары келерки жылы Түркияда өтө турган сегизинчи Жогорку деңгээлдеги стратегиялык кызматташтык кеңеши үчүн бекем пайдубалды түзөт”,-деди.
