АКШ менен Украина Вашингтондун Украинадагы согушту токтотуу планынын алкагында өткөрүлгөн сүйлөшүүлөрдү "жемиштүү" деп мүнөздөштү, бирок эки тарап тең бул маанилүү сүйлөшүүлөрдүн азырынча бүтө электигин баса белгилешти.

АКШнын мамлекеттик катчысы Марко Рубио жекшемби күнкү билдирүүсүндө дагы көп иштер жасалышы керек экенин айтты. Киев делегациясындагы булак болсо сүйлөшүүлөрдү "оңой эмес" деп сыпаттады.

Вашингтон дээрлик төрт жылга созулган согушту токтотуу планын түзүп, аны Москва менен Киевдин макулдугу менен ишке ашырууну көздөп жатат.

Женевадагы жолугушуулардан кийин өткөн бул сүйлөшүүлөр АКШнын президенти Дональд Трамптын атайын өкүлү Стив Виткоффтун Москвага сапарына да жол ачышы мүмкүн. Виткофф Украина маселесин Орусиянын президенти Владимир Путин менен талкуулайт деп күтүлүүдө.

Рубио: «Женевадагы сүйлөшүүлөрдү жана ушул аптадагы жылыштарды да эске алуу менен дагы бир абдан жемиштүү сессия өткөрдүк. Бирок дагы көп иштер жасалышы керек. Бул процесс сезимтал жана татаал», - деди.

Мамлекеттик катчы Рубио: «Көптөгөн өзгөрмөлөр бар жана албетте бул теңдемеге киргизилиши керек болгон дагы бир тарап бар. Бул маселе Виткоффтун ушул аптада Москвага сапары менен уланат», - деп кошумчалады.

Марко Рубионун билдирүүлөрүнөн кийин АКШнын президенти Дональд Трамп да билдирүү жасап, Флоридадагы сүйлөшүүлөрдөн кийин согушту токтотуу боюнча келишимге жетишүүгө «жакшы мүмкүнчүлүк» бар экенин айтты, бирок уланып жаткан коррупциялык чуулгандуу окуя процессти татаалдаштырып жатканын белгиледи.

АКШнын расмий өкүлүнүн айтымында, Виткофф дүйшөмбү күнү Москвага барып Орусиянын президенти Владимир Путин менен жолугушуусу күтүлүүдө.