Орусия бейшемби күнү НАТОнун же Евробиримдиктин мүчөлөрүнө каршы "агрессивдүү пландары" жок экенин жана бул боюнча жазуу жүзүндө кепилдик берүүгө даяр экенин кайталады.
Москвада элчилер жана эл аралык уюмдардын өкүлдөрү менен өткөн тегерек столдо сүйлөгөн сөзүндө тышкы иштер министри Сергей Лавров: "Москванын президент Путин ачык айткандай, НАТОнун же Евробиримдиктин мүчөлөрүнө каршы агрессивдүү пландары жок. Биз бул кепилдиктерди жазуу жүзүндөгү, юридикалык документте расмий түрдө бекитүүгө даярбыз. Албетте жамааттык жана өз ара негизде", - деди.
Лавров Орусиянын президенти Владимир Путин менен АКШнын президенти Дональд Трамптын атайын өкүлү Стив Витковдун Москвадагы акыркы сүйлөшүүлөрү, август айында Аляскадагы саммиттен кийин эки өлкөнүн ортосунда пайда болгон "түшүнбөстүктөрдү жана байланыштын үзгүлтүккө учурашын" чечкенин айтты.
Ал ошондой эле орус тарап Вашингтон менен саммитте жетишилген келишимдерди улантып жатканын, жамааттык коопсуздук кепилдиктери боюнча "кошумча сунуштарды" жеткиргенин айтып, "Биз коопсуздук кепилдиктери боюнча сүйлөшүүлөр бир гана Украина менен чектелбеши керектигин түшүнөбүз" деди.
Сергей Лавров Орусия "жамааттык контекстте түзүлгөн" жана юридикалык жактан милдеттүү келишимдерди түзүүгө алып келген бардык учурдагы сунуштарды карап чыгууга даяр экенин билдирип, мындай деп кошумчалады: "Биз бир кризистин артынан экинчиси дароо келишин каалабайбыз".
Ошондой эле Батыш өлкөлөрүн уланып жаткан Орусия менен Украинанын ортосундагы согушту дүйнөлүк коомчулук туш болгон Палестина сыяктуу маанилүү маселелердин "көңүл чордонун башка жакка буруу" үчүн "пайдаланып" жатат деп айыптады.
