Израилдин Иранга абадан сокку уруусунан кийин курчуп кеткен Жакынкы Чыгыштагы геосаясий чыңалуу, АКШ-Кытай соода сүйлөшүүлөрү дүйнөлүк рынокторго алып келген оптимизмге көлөкө түшүрдү. Ошол эле учурда, чыңалуу дагы да курчушу мүмкүн деген тынчсыздануулар инвесторлордун тобокелдик сезимин күчөттү.
АКШнын эң маанилүү соода өнөктөшү Кытай менен жаңы келишими жана башка өлкөлөр менен мунасага жетүү боюнча үмүттөр акциялар рыногун колдоп турса да, Израилдин Иранга акыркы чабуулунан кийин инвесторлордун көңүл чордону геосаясий тобокелдиктерге бурулду.
Кол салуудан кийин Brent мунайынын баасында кескин өзгөрүүлөр байкалды. Камсыздоо боюнча тынчсыздануулардан улам Brent мунайынын баасы баррелине $76.3ке жетип, февраль айынан бери эң жогорку деңгээлге жогорулады. Учурда Brent мунайынын баррель баасы $73.44 болуп, 5.4%га өстү (0620GMT).
Алтындын унций баасы болсо жума күнү $3,445ке жеткенден кийин $3,425 тегерегинде туруктуу болуп, 1.1%га өстү.
Европадагы индекс фьючерстик келишимдери, согуштук тынчсыздануулардан улам жаңы күндү терс маанайда баштады. Улуу Британиядагы FTSE 100 фьючерс индекси 0.3%га, Франциядагы CAC 40 жана Германиядагы DAX 40 фьючерс индекси 1.6% тегерегинде, ал эми Италиядагы FTSE MIB 30 фьючерс индекси 0.7%га төмөндөдү.
Азияда болсо Япониядагы Nikkei 225 индекси 1.2%га, Түштүк Кореядагы Kospi индекси 1.3%га, Кытайдагы Shanghai Composite индекси 0.7%га жана Гонконгдогу Hang Seng индекси 0.8%га төмөндөдү.
Израилдин чабуулдары жергиликтүү убакыт боюнча саат 3:00дө башталып, аскердик жана ядролук объектилер, ошондой эле турак жай аймактары бутага алынганын Ирандын маалымат каражаттары билдирди.
Израиль армиясы жума күнү эртең мененки чабуулда жалпы 200 учактын Иранга сокку урганын билдирди. Армиянын өкүлү бригадалык генерал Эффи Дефриндин айтымында, 200 учак 330 ок-дары таштады.
Буга жооп катары Иран акыркы сааттарда Израилге 100дөн ашуун дрон учурду жана бөгөт коюу аракеттери улантылып жатканын кошумчалады. Ошондой эле, чабуулдарда Ирандын бир нече жогорку даражалуу кызматкерлери, анын ичинде штаб башчысы Мохаммад Багери, Иран революциялык гвардиясынын башчысы Хоссейн Салами жана гвардиянын жогорку командири Голам Али Рашиддин өлтүрүлгөнүн ырастады.
Эки өлкө тең ыктымалдуу аскердик кагылышууга даярданып жатышканын билдиришти.
