АКШ президенти Дональд Трамп Россиянын мурдагы президенти Дмитрий Медведевдин 'акылсыз жана чагымчыл' деп мүнөздөгөн билдирүүлөрүнө жооп катары суу астындагы эки ядролук кемени ылайыктуу аймактарга жайгаштыруу буйругун бергенин жарыялады.
Трамп жума күнү социалдык тармактардагы бөлүшүүсүндө: "Бул акылсыз жана чагымчыл билдирүүлөр жөн гана сөз бойдон калбашы үчүн суу астындагы ядролук эки кемени ылайыктуу аймактарга жайгаштырууга буйрук бердим", - деди.
Бул кадам Трамп менен Россиянын Коопсуздук кеңешинин төрага орун басары Медведевдин ортосундагы курч талаш-тартыштан кийин ташталды. Буга чейин Трамп Москвага Украинада ок атышууну токтотуу боюнча 10 күндүк ультиматум берген жана антпесе Россиянын жана соода өнөктөштөрүнүн экспортторуна катуу тарифтердин киргизилерин эскерткен.
Россиянын кансыз согуш мезгилиндеги ядролук куралдар тууралуу эскертүү
Медведев Трампты 'ультиматум оюнуна' киришүү менен айыптап каршылык көрсөттү жана Россиянын кансыз согуш мезгилине таандык ядролук курал жарактарын эске салды. Трамп болсо Медведевди “айткан сөздөрүнө этият болуу" менен” эскертип жооп берди.
Кремлдин өкүлдөрү АКШнын президентинин коркутууларына олуттуу карабагандарын билдирип, Москванын Трамп койгон мөөнөткө баш ийүүгө ниеттенип жатканы тууралуу эч кандай белги берген жок.
Трамптын стратегиялык элементтерди кайра жайгаштыруу чечими, Украинадагы согуштан улам күчөгөн чыңалуу шартында сөздөрдүн кескин курчуганын көрсөтүүдө.
2022-жылы Россиянын Украина менен согуш башташынан бери Медведев Батышты бутага алган курч билдирүүлөрү менен Москва жетекчилигиндеги эң агрессивдүү фигуралардын бирине айланды.
