АКШнын Казына министрлиги Колумбиянын президенти Густаво Петрого каршы санкциялардын киргизилгенин жарыялап, администрациясынын баңгизат соодасына каршы күрөшүүдөгү жетишсиздигин айыптады.
Казына министри Скотт Бессент: "Президент Густаво Петро кызматка киришкенден бери Колумбияда кокаин өндүрүшү ондогон жылдардагы эң жогорку деңгээлге жетип, АКШны курчап, америкалыктарды ууландырды", - деп билдирди. Бессент Петро "баңгизат картелдеринин өнүгүшүнө жол берип, бул иш-аракеттерди токтотуудан баш тарткан" деп айыптады.
Санкциялар ошондой эле Петронун улуу уулу Николас Фернандо Петро Бургос, аялы Вероника дель Сокорро Алькосер Гарсия жана ички иштер министри Армандо Бенедеттини кара тизмеге киргизди.
Санкциялар жарыялангандан кийин, АКШнын Мамлекеттик департаменти Колумбияны баңгизатка каршы күрөшүү боюнча өнөктөш катары сертификациялабай турганын жарыялады. Катчы Томми Пиготт: "АКШ Петронун баңгизат террористтерин кубаттоосуна чыдабайт", - деп билдирди жана Колумбиянын коопсуздук күчтөрүн жана сот мекемелерин колдоону улантарын белгиледи.
Петронун жообу
Колумбиянын президенти Петро кийинчерээк X платформасында Бессентке жооп берип, АКШнын Казына министрлигинин билдирүүлөрүнүн "калп" экедигин айткан.
"Кока жалбырагын отургузуу Дюк өкмөтүнүн тушунда 230 000 гектарга чейин өскөн; менин өкмөтүмдө болсо, 2024-жылы жылдык өсүү темпи 42 пайызды түзсө, мен бул көрсөткүчтөрдү 2022-жылы 13 пайызга, 2023-жылы 9 пайызга жана 2024-жылы 3 пайызга чейин төмөндөтүүгө жетиштим", - деди Петро.
Вашингтондун дооматтарына карама-каршы, өкмөтү тарыхтагы эң көп кокаинди колго түшүргөнүн айтты.
“АКШнын Каржы министрлигинин жасап жаткан иши – бул кысым көрсөтүүчү режимге мүнөздүү адилетсиздик”, – деп белгиледи Петро.
