«Конституциялык соттун чечими жыйынтык чыгаруучу болуп саналат жана даттанууга же кайрадан кароого болбойт» деп айтылды.
Грузиянын Конституциялык соту президент Саломе Зурабишвилинин октябрда өткөрүлгөн талаштуу парламенттик шайлоонун жыйынтыгын жокко чыгаруу боюнча доо арызын четке какты.
Жогорку соттун сайтында жарыяланган чечимде, Зурабишвили козгогон ишке “кеңири иликтөө” жүргүзүлбөй турганы айтылды.
Сот ошондой эле оппозициялык 30 депутаттын "Грузин кыялы" партиясы көпчүлүк добушка ээ болгон шайлоонун жыйынтыгына каршы чыккан дагы бир доосун четке какты.
Чечимде ошондой эле «Чыгарылган өкүм жыйынтык чыгаруучу болуп саналат жана даттанууга же кайрадан кароого болбойт» делди.
Уланган каршылык көрсөтүүлөр
19-ноябрда Зурабишвили Конституциялык сотко, 26-октябрдагы шайлоонун жыйынтыгын жокко чыгаруу боюнча доо арыз менен кайрылган. “Грузин кыялы” партиясы 53,93% добуш алып, 150 орундуу парламентте 89 орун менен көпчүлүккө ээ болгон.
Премьер-министр Ираклий Кобахидзе жана партиянын ардактуу төрагасы Бидзина Иванишвили баш болгон «Грузин кыялынын» расмий өкүлдөрү добуш берүүнүн жыйынтыгын кубатташты.
Бирок Зурабишвили шайлоонун жыйынтыгын тааныбай турганын айтып, добуш берүүнүн Орусиянын кийлигишүүсү менен өткөнүн билдирди. Оппозициялык партиялар болсо шайлоону "уурдалган" деп сыпаттап, өкмөткө каршы нааразылык акциялары уюштурулду жана Евробиримдикке мүчөлүк сүйлөшүүлөрү токтотулду.
Кобахидзе шайлоодогу бурмалоолор тууралуу айыптоолорду четке кагып, шайлоодогу ар кандай мыйзам бузууларды дүйнөнүн башка өлкөлөрүндөгү шайлоолорго мүнөздүү деп сыпаттады.
Соттун чечими тууралуу президент азырынча комментарий бере элек.
