Украинанын президенти Владимир Зеленский Ирандын «Шахед» үлгүсүндөгү дрондорго каршы туруу үчүн Жакынкы Чыгышка 201 украиналык адис жөнөтүлгөнүн, 34 адистин да бул аракеттерге жардам берүүгө даяр экенин айтты.

Зеленский Британия парламентинин Вестминстер комитет залында 60ка жакын депутаттын алдында сүйлөп жатып: "Командаларыбыз азыр Бириккен Араб Эмираттарына, Катар, Сауд Арабиясына жана Кувейтке багыт алышты. Башка бир нече өлкө менен да иштеп жатабыз", - деди.

Ирандын коңшуларына каршы колдонгон дрондордун көздөгөн бутасына жетпеши керектигин баса белгилеген Зеленский, Украина бул аскердик адистерди «АКШ баш болгон өнөктөштөрдүн өтүнүчү менен» жөнөткөнүн айтты.

Украина лидердин айтымында, бул кадам АКШ менен биргеликте иштелип чыккан келишимдин бир бөлүгү болуп саналат. «Биз бардык ишенимдүү өнөктөштөрүбүзгө дрондор боюнча практикалык кызматташуудан тарта келечектеги коргонуу альянстарына чейинки ушундай келишимдерди сунуштоого даярбыз», — деп кошумчалады Зеленский.

Зеленский Ирандын учкучсуз аппараттары кымбат баалуу стратегиялык объектилерди «арзан жол менен жок кылуу» үчүн иштелип чыкканын айтып, Ирандын Россияга бул аппараттарды учурууну үйрөтүп, өндүрүш технологиясын бергенин белгиледи.

Зеленский: "Россия аларды кийинчерээк өркүндөтүп, азыр аймакта колдонулуп жаткан Ирандын "Шахед" дрондорунун курамында орус тетиктер бар экени боюнча бизде ачык далилдер бар", - деди.

«Ошондуктан, Ирандын айланасында болгондор, Россия менен Ирандын ортосундагы кызматташуудан улам биз үчүн алыс согуш эмес. Биздин буга кайдыгер карап турууга укугубуз жок деп эсептейбиз», — деди Зеленский.

Мындан тышкары, Зеленский Ирандын бир «Шахед» аппараты болжол менен 50 миң доллар турарын, бирок өнөктөштөр аны атып түшүрүү үчүн көбүнчө баасы 4 миллион долларга чейин жеткен ракеталарды же истребителдерди колдонууга мажбур болуп жатканын белгиледи.