Пакистандын премьер-министри Шахбаз Шариф, Индия менен болгон аскердик чыңалуудан кийин Түштүк Азияда тынчтыкты чыңдоодогу ролу үчүн президент Режеп Таййип Эрдоганды мактады.
Шариф шейшемби күнү X платформасында: «Урматтуу бир тууганым президент Режеп Таййип Эрдогандын Пакистанга карата күчтүү колдоосу жана кажыбас тилектештигинен абдан таасирлендим” деп жазды.
“Пакистан Түркия менен эзелки жана туруктуу бир туугандык байланыштарына сыймыктанат жана бул байланыштар ар бир жаңы кыйынчылыктар менен бекемделе берет" деп кошумчалады.
“Конструктивдүү роль, биргелешкен аракеттер”
“Мен өзгөчө урматтуу президенттин (Эрдогандын) Түштүк Азияда тынчтыкты орнотуудагы конструктивдүү ролу жана биргелешкен аракеттери үчүн ыраазычылык билдирем,” – деди Шариф.
“Пакистан менен Түркиянын ортосундагы байланыштар эки өлкөнүн жана алардын элинин жаркын келечегин куруу үчүн биргелешип иш алып баруу менен дагы да күчтөнөт деп үмүттөнөм” деди.
Индия менен Пакистан ортосундагы чыңалуу 22-апрелде Индиянын башкаруусундагы Кашмирде 26 адамдын өмүрүн алган кол салуудан кийин күчөй баштаган. Бул окуя ядролук куралы бар эки коңшунун акыркы жыйырма жылдан ашык убакыттагы эң оор кагылышуусуна алып келди.
Түштүк Азиядагы эки кошуна өлкөнүн ортосундагы кагылышуулар АКШнын ортомчулугунда өткөн апта соңунан бери күчүндө болгон ок атышпоо келишими менен аяктады.
