АКШ президенти Дональд Трамп шейшемби күнү Япониянын өзүн-өзү коргоо күчтөрүнүн F-35 согуштук учактары үчүн алгачкы ракета партиясын жеткирүүгө макулдук бергенин жарыялады.
"Мен ракеталардын биринчи партиясынын бекитилгенин жарыялоодон кубанычтамын", - деди Трамп Токиого жакын Йокосука деңиз базасында USS George Washington атомдук учак ташуучу кемесиндеги америкалык аскерлерге кайрылып жатып.
“Ракеталар ушул жумада жеткирилет, демек, графиктен алдыда баратабыз,” – деп кошумчалады Трамп.
Аскердик үстөмдүк тууралуу билдирүү
Трамп АКШнын аскердик үстөмдүгүн баса белгилеп: “Мындан ары согуш болсо, биз аны жеңебиз. Биз аны мурда эч ким көрбөгөндөй жеңебиз,” – деди.
Трамп АКШнын аскер-деңиз флотунун күчүн мактап, алардын флотуна эч бир флоттун "жакын эмес" экенин жана Американын эң мыкты жабдууларды, ок-дарыларды, курал-жарактарды, ракеталарды жана учактарды чыгарарын айтты.
Ал ошондой эле өнүккөн курал-жарактардан тышкары, АКШнын аскердик күчү анын кызматкерлерине көз каранды экенин баса белгиледи. “Эгерде бул куралдарды иштеткен туура адамдар болбосо, анда мааниси болбойт,” – деди Трамп.
Трамп бул билдирүүлөрдү Япониянын премьер-министри Санаэ Такаичи менен бирге үч өлкөнү камтыган Азия сапарынын алкагында, аскерлерге барганда айтты.
Токио АКШ менен өнөктөштүктү “жогорку деңгээлге” көтөрүүгө ниеттенүүдө
Трамптан кийин сөз сүйлөгөн Такаичи Япониянын Азия-Тынч океан аймагында тынчтыкты жана туруктуулукту камсыз кылууга “активдүү салым кошооруна убада кылды.
Такаичи өзү жана Трамп аскерлер менен сүйлөшкөн учак ташуучу кеменин аймактагы эркиндиктин жана тынчтыктын сакталышынын "символу" экенин айтты.
Өзүнүн саясий устаты жана мурдагы премьер-министр Синдзо Абенин аймактагы коопсуздук боюнча позициясын эске салган Такаичи “эркин жана ачык Индо-Тынч океан” үчүн ошол эле “чечкиндүүлүктү” улантарын айтты. Бул аймактын жалпы тынчтыгы жана өнүгүүсү үчүн негиз болорун белгиледи.
Япония менен АКШнын өнөктөштүгүнө “эң мыкты” деп баа берген Такаичи аны “мурдагыдан да жогорку деңгээлге” көтөрөрүн билдирди.
Өткөн жумада шайлангандан кийинки алгачкы саясий сөзүндө Такаичи Япониянын коргонуу боюнча каржылоону мурдагы максаттарынан эки жыл эрте, ИДПнын 2%га чейин көбөйтөөрүн убада кылды.
Өз ара коргонуу келишиминин алкагында АКШ Японияда 50 миңден ашуун аскерин, курал-жарактарын жана аскердик базаларын жайгаштырган.
