Түркиянын Тышкы иштер министрлиги, Тышкы иштер министри Хакан Фидандын Стамбул шаарында Балкан өлкөлөрүнөн келген кесиптештери менен өз өзүнчө жолугушууларды өткөргөнүн жарыялады.
Министрликтин билдирүүсүнө ылайык, Босния жана Герцеговинанын тышкы иштер министри Элмедин Конакович, Косовонун тышкы иштер министри Доника Гервалла-Шварц жана Албаниянын тышкы иштер министри Элиза Спиропали менен болгон жолугушуулар жума күнү өткөрүлгөн экинчи Балкан тынчтык платформасынын жыйынынын алкагында ишке ашты.
Фидан Сербиянын тышкы иштер министри Марко Журич, Түндүк Македониянын тышкы иштер жана тышкы соода министри Тимчо Муцунски менен Черногориянын тышкы иштер министри Эрвин Ибрахимович менен да жолугушту.
Босния жана Герцеговинанын Тышкы иштер министрлиги X социалдык тармагы аркылуу жасаган билдирүүсүндө, Конакович Балкан тынчтык платформасынын ишке ашырылышындагы ролу үчүн Фиданга ыраазычылык билдиргенин, жолугушууда глобалдык жана аймактык окуялар, өзгөчө Босния жана Герцеговинадагы саясий абалдын талкууланганын жарыялады.
Босния тарабы бул жолугушуунун эки тараптуу карым - катнаштардын чыңдалышы, аймактык туруктуулукту жана Босния - Герцеговинанын Европа Биримдигине кирүү процессине болгон жалпы берилгендигин кайрадан ырастаганын баса белгиледи; Конакович Фиданды өз өлкөсүнө иш сапары менен келүүгө чакырды.
Косовонун тышкы иштер министри Гервалла-Шварц болсо Инстаграмдагы баракчасында, жолугушууларда Косовонун Европа Биримдиги жана НАТО менен интеграциялануу боюнча стратегиялык багыты, ошондой эле коопсуздук, аймактык туруктуулук жана жакшы коңшулук мамилелердеги кызматташтык талкууланганын билдирди. Гервалла-Шварц Түркиянын туруктуу колдоосу үчүн ыраазычылык билдирип, Анкаранын Балкандагы диалогду, тынчтыкты жана туруктуулукту илгерилетүүдөгү ролун баса белгиледи.
Түндүк Македониянын атынан билдирүү жасаган Муцунски, түрк кесиптеши менен болгон сүйлөшүүлөрдө эки тараптуу карым - катнаштар, экономикалык кызматташтык жана инвестициялык мүмкүнчүлүктөрдүн талкууланганын; эки өлкөнүн НАТОдогу союздаштыгы жана аймактык демилгелерге болгон берилгендиги дагы бир жолу тастыкталганын айтты.
Албаниянын тышкы иштер министри Спиропали жолугушууда Албания менен Түркиянын ортосундагы стратегиялык өнөктөштүк туруктуу бекемделип жатканын жана ушул жылы үчүнчү жогорку деңгээлдеги тармактар аралык кызматташтык кеңешинин жыйыны өткөрүлүшү пландалып жатканын билдирди. Спиропали ошондой эле Анкара жана Тиранада өтүүчү НАТОнун саммиттери эки союздаштын ортосундагы кызматташтыкты андан ары тереңдетүү үчүн олуттуу мүмкүнчүлүктөрдү түзөрүн белгиледи.
Сербиянын тышкы иштер министри Журич болсо Фидан менен болгон сүйлөшүүлөрүндө эки тараптуу саясий диалог, күн тартибиндеги негизги темалар, ошондой эле аймактык жана глобалдык маселелердин каралганын айтты.
