Казакстанда кечээ өткөн аскердик машыгуу учурунда катуу шамалдан Каспий деңизине түшүп кеткен он жети аскерден он төртү каза болуп үчөө куткарылды.
Казакстандын Коргоо министрлиги аскелерди издөө жана куткаруу иштери аяктаганын билдирди.
Министрликтин маалыматына караганда, бүгүн эртең менен деңизден дагы эки аскердин сөөгү табылган. Ушундайча машыгуу учурунда аба ырайынын кескин начарлашынан улам деңизге түшүп кеткен он жети аскерден он төртү каза болуп, үчөө куткарылды.
Тергөө иши улантылууда
Казакстандын Башкы прокуратурасынан берилген маалыматта да Маңгыстау облусундагы машыгуу учурунда аскерлердин каза болушуна байланыштуу тергөөнүн улантылып жатканы кабарланды.
Өлкөдө машыгуу учурунда каза болгон аскерлер үчүн 25-сентябрь Улуттук аза күнү деп жарыяланды.
Өлкө боюнча желектер жарым түшүрүлүп, бардык концерттер жана көңүл ачуучу программалары токтотулду.
