АлБарака тарабынан уюштурулган Ислам экономикасынын экинчи эл аралык саммити Стамбул шаарында башталды. Бул иш-чара Ислам финансылык жана финансылык эмес мекемелерди күчтөндүрүүгө, алардын туруктуу өсүү максаттарына жетүүсүнө жана жаңы стратегиялар аркылуу дүйнөлүк экономикага олуттуу таасир этүүсүнө жардам берүүгө багытталууда.

Жума күнү башталган эки күндүк саммит, Президенттиктин Инвестиция жана каржы кеңсеси, Стамбул Финансы борбору (IFC), Албарака Түрк банкы, Ибн Халдун университети жана Ислам Кызматташтык Уюмунун Жаштар форуму (ICYF) менен биргеликте уюштурулду.

Иш-чарага жогорку деңгээлдеги аткаминерлер, адистер жана жеке сектордун өкүлдөрү катышууда.

Саммиттин максаты – операциялык натыйжалуулукту жогорулатуу, инновацияларды колдоо, тобокелдиктерди башкарууну күчтөндүрүү, финансылык катышууну илгерилетүү жана тармактын катышуучуларынын ортосунда кызматташтыкты бекемдөө үчүн Ислам принциптерин тереңирээк түшүнүүнү өнүктүрүү болуп саналат.

“Жаңы жолдорду түзүүнү көздөйбүз”

Саммитте Ислам экономикасынын принциптерин интеграциялоо боюнча жогорку деңгээлдеги талкуулар болору күтүлүүдө.

АлБарака Ислам Экономика Форумунун башкы катчысы Юсеф Хасан Халауи ачылыш аземинде: “Биз жөн гана жаңы жолдорду басып өтүү үчүн эмес, жаңы жолдорду түзүүнү көздөйбүз. Стамбулда, Мединада, Лондондо, Куала-Лумпурда, Карачиде, Каирде жана башка көптөгөн шаарларда жаңы демилгелерди жаратуудабыз,” – деп билдирди.

Ислам экосистемасынын алкагында дагы көптөгөн демилгелерди түзүү зарыл экенин кошумчалады.