Ирактын тышкы иштер министри Фуад Хүсейн Түркиянын ПККны куралсыздандыруу аракеттерин колдоого убада берди жана бул багытта аймактык деңгээлде кеңири чечим табууну көздөгөндөрүн кабарлады.
Ирактын мамлекеттик INA агенттигинин маалыматына караганда, министр Хүсейн түркиялык кесиптеши Хакан Фидан менен биргелешкен маалымат жыйынын өткөрүп, "Ирак Түркия менен ПККнын ортосундагы диалогду колдойт жана бардык тараптарды канааттандырган чечимге үмүттөнөт" деп билдирди.
Түркия, АКШ жана Европа Биримдиги тарабынан террордук уюм деп табылган ПКК май айында конгресс өткөрүп, таркатылганын жарыялаган. Бул чечим уюмдун лидери Абдулла Өжаландын февраль айында, ондогон жылдарга созулган кол салууларды токтотуу чакырыгынан кийин кабыл алынды.
Террордук уюм 26-октябрда Түркиядан чыгып кеткенин жарыялаган.
Багдад-Анкара мамилесин “тарыхый” деп мүнөздөгөн Хүсейн, Фидан менен өткөргөн сүйлөшүүлөрдө эки өлкө үчүн маанилүү жана өз ара кызыкчылыкты билдирген суу маселеси талкууланганын айтты.
Министр Ирак менен Түркиянын ортосунда ар кандай тармактарда 26 өз ара түшүнүшүү меморандуму бар экенин жана суу ресурстарын биргелешип башкаруу алкагы боюнча документке жакынкы сааттарда кол коюларын белгиледи.
Түркия менен Ирак 2009-жылы түзүлгөн Жогорку деңгээлдеги стратегиялык кызматташтык кеңеши менен бекемделген терең тарыхый жана маданий байланыштарга ээ. Эки өлкөнүн ортосундагы соода-сатык кызматташуунун негизги багыты катары өзгөчөлөнүп турат.
