Кремлдин басма сөз катчысы Дмитрий Песков Орусия Түркиянын Украинадагы жаңжалды чечүүгө салым кошуу каалоосун кубаттаганын айтты.
Жума күнү Түркмөнстандын борбору Ашхабадда өткөн маалымат жыйында Песков Москва Түркиянын президенти Режеп Таййип Эрдогандын жаңжал тууралуу айткандарын колдой турганын билдирди.
Песков: "Президент Түркиянын ортомчулук аракеттерин улантууга жана тынчтык процессине салым кошууга даярдыгын жана каалоосун билдирди; бул да өлкөбүз тарабынан кубатталат", - деди.
Ашхабаддагы Тынчтык жана коопсуздук боюнча эл аралык форумда Борбордук Азия лидерлери Украина маселесин талкуулаштыбы деген суроого Песков: "Алар бул маселеге дээрлик токтолгон жок", - деп жооп берди.
Кремлдин өкүлү АКШнын президенти Дональд Трамп Украинанын жана Европа Биримдигинин өкүлдөрү менен жолугушабы деген суроого жооп берип жатып Москванын бул тема боюнча эч кандай маалыматы жок экенин билдирди.
Трамп мурда АКШнын өкүлдөрү ишемби күнү Европа жана Украинанын өкүлдөрү менен өткөрүлө турган жыйынга "эгерде жакшы келишим түзүү мүмкүнчүлүгү болсо" гана катышаарын айткан.
Эрдоган Путин менен жолукту
Түркиянын президенти Режеп Таййип Эрдоган жума күнү Ашхабадда өткөн Эл аралык Тынчтык жана коопсуздук форумунда Орусиянын президенти Владимир Путин жана башка дүйнө лидерлери менен жолугушту.
Түркиянын Президенттигинин X платформасындагы билдирүүлөргө ылайык, Эрдоган Орусиянын президенти Путин, Пакистандын премьер-министри Шахбаз Шариф жана Түркмөнстандын президенти Сердар Бердымухамедов менен жекеме-жеке жолугушууларды өткөрдү.
Эрдоган ошондой эле форумда үй-бүлөлүк сүрөткө түшүүдөн мурун Ирандын президенти Масуд Пазешкиан менен кыскача сүйлөшүү өткөрдү.
Президент Эрдогандын бул жолугушуулары анын Бириккен Улуттар Уюмунун Башкы Ассамблеясы 2025-жылды "Тынчтык жана коопсуздуктун эл аралык жылы" деп жарыялагандан жана Түркмөнстандын туруктуу нейтралитетинин 30 жылдыгын белгилөөдөн кийин уюштурулган форумдагы дипломатиялык ишмердүүлүгүнүн бир бөлүгү болду.
