Жетекчилер Техастагы селден каза болгондордун саны кеминде 119га жеткенин, 170тен ашуун дайынсыз жоголгон адамды издөө уланып жатканын кабарлады.
Эң катуу жабыркаган Керр округунда 95 адам, анын ичинде 59 чоң киши жана 36 бала каза болгон.
Жетекчилер 27 кишинин ким экендиги азырынча аныктала электигин билдиришти, ал эми башка каза болгон кишилер жакын жердеги райондордо катталды.
Куткаруу операциялары кеңейген сайын штаттын өзгөчө кырдаалдардын алдын алуу системасына карата коомчулуктун сыны күчөдү. Texas Public Radio жана KSAT тарабынан жүргүзүлгөн иликтөөлөр эртең мененки саат 4:22де жиберилиши талап кылынган массалык эскертүү билдирүүсү бекитүү маселелеринен улам кечиккенин жана айрым тургундардын сел тууралуу көптөгөн сааттардан кийин кабары болгонун билдирди.
Жетекчилер бир гана Керр округунда 161 кишинин жоголгондугун билдирди. Жоголгондордун арасында Гвадалупе дарыясынын жанындагы "Кэмп Мистик" аттуу кыздардын жайкы лагеринен беш кыз жана бир кеңешчи да бар.
Үйлөрүнө кайткан тургундар кыйроо менен бетме - бет. Жетекчилер издөө топторуна кийлигишүүнүн болбошу керектигин, анткени урандынын тазаланышы үчүн оор каражаттардын колдонулгандыгын баса белгиледи.
Керри окуругунун шефи Ларри Лейта : “Бул баары салым кошуусу керек болгон кырдаал. Жоголгон жакындарын издеген үй - бүлөлөргө, коомчулукка жана мени бул кызматка алып келген адамдарга жооп берилиши керек”,- деди.
Сиреналык системанын жоктугу жана байланыштагы ыраатсыздык барган сайын нааразычылыктарды жаратууда. 2015-жылдан бери Керр округу суу ташкыны тууралуу эскертүү системасын орнотуу үчүн федералдык грант алууга кайрылууда.
Жекшемби күнү Трамп администрациясы суу ташкынын "чоң кырсык" деп жарыялап, куткаруу иштерине жардам берүү үчүн федералдык ресурстарды мобилизациялады.
Техас штатынын губернатору Грег Эбботт шаршемби күнү суу ташкындарына чара көрүү үчүн штаттын 2200дөн ашык кызматкерди жана 1200 унаа жана жабдууларды жөнөткөнүн билдирди. Учурда жүрүп жаткан куткаруу жана колдоо иштерине 20дан ашык мамлекеттик орган катышууда.
