Пакистан менен Индиянын коргоо министрлери өткөн айда Кашмир тууралуу болгон аскердик чыңалуудан кийин биринчи жолу бетме-бет жолугушары күтүлүүдө. Бул жолугушуу Шанхай Кызматташтык Уюмунун (ШКУ) эки күндүк саммитинин алкагында Кытайдын чыгышындагы Циндао шаарында өтөт.
Саммит шаршемби күнү башталып, аны Кытайдын коргоо министри Адмирал Дун Цзюнь өткөрөт. Кытайдын Коргоо министрлигинин билдирүүсүнө ылайык, бул иш-чара аймактык чыңалуу, Жакынкы Чыгыштагы кырдаал курчуп турган мезгилде өтүүдө.
Пакистан тарапты коргоо министри Хваджа Асиф жетектейт. Индиянын коргоо министри Раджнат Сингх да жогорку деңгээлдеги делегация менен катышып, Кытай, Россия жана башка катышуучу өлкөлөрдүн өкүлдөрү менен жолугушууларды өткөрөшү пландалууда.
2025-жылдын май айында Кашмирдин талаштуу аймагында Индия менен Пакистандын ортосундагы аскердик чыңалуу күчөгөндөн бери эки ядролук коңшу өлкөнүн мамилеси курч бойдон калууда. ШКУ саммити аймактык жана глобалдык коопсуздук, терроризмге каршы кызматташтык жана мүчө мамлекеттердин аскердик координациясына басым жасайт.
Кезектешкен башкаруучулукту аткарып жаткан Кытай бул жыйындын максаты "аскердик өз ара ишенимди бекемдөө жана тереңдетүү", "аймактык тынчтык менен туруктуулукту камсыз кылуу" экенин билдирди.
ШКУ 2001-жылы түзүлгөн жана курамына Кытай, Россия, Индия, Пакистан, Иран, Казакстан, Кыргызстан, Өзбекстан, Тажикстан жана Беларусь кирет. Уюмдун Регионалдык Терроризмге Каршы Күрөшүү Структурасы (РАТС) негизги коопсуздук органы болуп эсептелет.
Кытай быйылкы төрагалык темасын "Шанхай рухун бекемдөө: ШКУ алдыга жылууда" деп белгиледи.
