Түркиянын тышкы иштер министри Хакан Фидан Белградга сапарынын алкагында дүйшөмбү күнү Сербиянын президенти Александр Вучич менен жолугушту. Бул тууралуу Түркиянын тышкы иштер министрлиги кабарлады.
Жолугушуудан кийин Вучич социалдык тармактарда Фиданды кабыл алганына кубанычта болгонун билдирип, Сербиянын аймактык туруктуулук жагынан Түркия менен мамилелерине өзгөчө маани бергенин баса белгиледи.
Вучич эки өлкөнүн ортосундагы карым-катнаштарды активдүү саясий диалог жана экономика, энергетика, туризм, маданият жана билим берүү өңдүү тармактарда кеңири кызматташуу катары баалады.
Ал ошондой эле Түркиянын 2027-жылы Белградда өтө турган Дүйнөлүк Экспого катышуу ниетин кубаттап, бул эки элдин ортосундагы бекем өнөктөштүктүн жана өз ара ишенимдин белгиси экенин айтты.
“Сербия Түркия менен болгон мамилелерине өзгөчө маани берет, анткени Түркия аймактык туруктуулуктун негизги оюнчусу бойдон калууда”, - деп билдирди Вучич.
Фидан Сербиянын тышкы иштер министри Марко Джурич жана Белграддагы Түркия элчилигинде бир катар серб саясий ишмерлери менен да жолугушту.
Жолугушууга Социал-демократиялык партиянын төрагасы Расим Ляйич, Адилеттик жана ынтымак партиясынын төрагасы жана Элдешүү, аймактык кызматташтык жана социалдык туруктуулук министри Усаме Зукорлич, ошондой эле Нови-Пазардан Санжак Демократиялык аракет партиясынын өкүлү парламент мүчөсү Ахмедин Скрийель катышты.
