АКШнын президенти Дональд Трамп Ак үйдө журналисттерге билдирүүсүндө, Колумбия баңги аткезчилигинде роль ойнойт деген айыптоолордон улам бул өлкөгө каршы «өтө олуттуу чараларды» көрүшү мүмкүн экенин айтты.

Шаршемби күнү Ак үйдө журналисттерге маалымат берген Трамп «Ал (президент Густаво Петро) бандит жана жаман адам. Абдан көп баңгизат өндүрдү. Бүгүнкү күндөн тарта биз Колумбияга бардык төлөмдөрдү токтоттук», – деди.

Трамп Петронун өлкөсүнө абдан начар кызмат кылганын жана Колумбияда кокаин заводдору бар экенин айтып: "Биз ага жана анын өлкөсүнө каршы абдан олуттуу чара көрөбүз. Өз өлкөсүн өлүм тузагына түшүрдү" деп билдирди.

‘Мен өзүмдү жактайм’

Трамптын билдирүүлөрүнөн кийин дароо Петро АКШ президентинин жалаасынан АКШда өзүн мыйзамдуу түрдө жактай турганын айтты. Петро X платформасында «Американын сот системасындагы америкалык юристтер менен бирге АКШнын аймагындагы жогорку даражалуу аткаминерлердин мага карата жалаа жабууларынан мен өзүмдү коргойм», – деди.

Петро: "Карибдеги бийликте тургандар тарабынан жасалган геноцидге жана киши өлтүрүүгө ар дайым каршы турам" деп билдирди.

Ошондой эле Петро Колумбиянын жардамы талап кылынганда баңгизат соодасына каршы күрөшө турганын белгилеп "Баңги аткезчилиги менен күрөшүүдө биздин жардамыбыз керек болгондо, Америка коомчулугу аны алат. Бизден жардам сураган мамлекеттер менен бирге баңги аткезчилери менен күрөшөбүз" деп айтты.