Ишемби күнү Бакуда сөз сүйлөгөнпрезидент Режеп Таййип Эрдоган Түркиянын Азербайжан менен Армениянын ортосундагы туруктуу тынчтыкка болгон чакырыгын жана колдоосун кайталады.
Азербайжандын Карабахтагы жеңишинин беш жылдыгын белгилөө аземинде сөз сүйлөгөн Эрдоган 30 жылдык армян оккупациясынын аякташынан мактоо менен сөз кылып, мунун Кавказия үчүн бир бурулуш жери деп мүнөздөдү.
Эрдоган боштондук олуттуу адилетсиздикке чекит коюп гана тим болбостон, аймактык туруктуулук үчүн "жаңы доорду" баштаганын айтып, бардык тараптарды жеңишти туруктуу тынчтыкка айландырууга чакырды.
"Биз кек сактабайбыз жана өткөндөгү кыйынчылыктардын кайталанышына жол бербейбиз", - деген Эрдоган, согуштан кийинки мезгилди Кавказияда туруктуу тынчтыкка жетүү жолундагы маанилүү этап катары көрүшөрүн кошумчалады.
Кызматташтыкты бекемдөө
Президент Эрдоган Азербайжандын президенти Илхам Алиевдин Армения менен тынчтык келишимине жетүү боюнча "чын жүрөктөн жасаган аракеттерин" мактап, Армениянын премьер-министри Никол Пашиняндын "конструктивдүү кадамдарына" жогору баа берди.
«Бул улуу жеңиш эки лидердин конструктивдүү мамилеси менен аймакта тынчтыкты жана бейпилдикти бекемдей турган узак мөөнөттүү келишимге алып келет деп үмүттөнөм», - деди Эрдоган жана Түркиянын бул процессти ар тараптан колдоого даяр экенин кошумчалады.
Эрдоган ошондой эле Карабах согушунда согушкан азербайжандык жоокерлерге жана ардагерлерге терең урматын билдирип, алардын күрөшүн «баатырдык» деп мүнөздөдү.
Президент Эрдоган Карабахтагы жеңиштин «аймактагы геосаясий тең салмактуулукту өзгөрткөнүн» айтып, Түркиянын Азербайжандын ийгилиги менен сыймыктанаарын кошумчалады.
Президент ошондой эле өсүп жаткан эки тараптуу карым - катнаштарга токтолуп, жаратылыш газы түтүктөрү жана транспорттук коридорлор сыяктуу ири энергетикалык долбоорлордун эки өлкөнүн ортосундагы кызматташтыкты бекемдегенин белгиледи.
