Израиль Ирандын коопсуздук кызматынын башчысы Али Ларижанинин өлтүрүлгөнүн билдирди
Израилдин коргоо министри Исраэл Кац Али Ларижани жана Басиж командири Голамреза Сулеймани түнкү аба соккуларында өлтүрүлгөнүн айтты, бирок Ирандын расмий өкүлдөрү муну азырынча тастыктай элек.
Израилдин коргоо министри Исраил Кац шейшемби күнү Ирандын коопсуздук кызматынын жогорку өкүлү Али Ларижани аба соккусунда өлтүрүлгөнүн кабарлады.
Өзүнүн кеңсеси тарабынан жарыяланган билдирүүдө Кац Ларижани менен Басиж командири Голамреза Сулейманинин түнкү чабуулдарда "таасирсиз кылынгандарын" айтты.
"Мен жаңы эле Башкы штабдын башчысынан Ларижани - Жогорку Улуттук коопсуздук кеңешинин башкы катчысы - жана Ирандын борбордук репрессиялык аппараты Басиждин башчысы Сулейманинин кечээ түнү жок кылынгандыгы тууралуу маалымат алдым", - деди Кац министрлиги тарабынан жарыяланган билдирүүдө.
Израилдин маалымат каражаттары мурда Ирандын Жогорку Улуттук коопсуздук кеңешинин башчысы катары Ларижанинин Израилдин түнкү соккуларынын бутасы экенин жазышкан.
Ирандын расмий өкүлдөрү бул сөздөргө дароо жооп кайтарышкан жок.
Бирок Израилдин билдирүүсүнөн кийин Ирандын мамлекеттик маалымат каражаттары Ларижаниге таандык деп болжолдонгон кол жазма катты жарыялашты.
Ларижанинин X аккаунтундагы акыркы билдирүүсү шейшемби күнү 17-мартта саат 09:40 GMTде жарыяланган. Бул билдирүү Ирандын деңиз флотунда курман болгондордун сөөк коюу зыйнатына карата кол жазма кат эле.
Эгер анын өлүмү тастыкталса, согуштун биринчи күнүндө каза болгон Жогорку лидер Али Хаменеиден берки өлтүрүлгөн эң жогорку даражалуу ирандык жетекчи болот.
Мурдагы өзөктүк сүйлөшүүчү жана Хаменеинин жакын өнөктөшү Ларижани жума күнү Тегеранда Кудс күнүнө арналган иш-чараларга катышып жүргөнү көрүнгөн.
Ошол эле күнү кечинде АКШ Ларижанини кошкондо, Ирандын Революциялык гвардиясы менен байланышы бар 10 жогорку даражалуу аскер жана чалгын кызматкери тууралуу маалымат бергендерге 10 миллион долларга чейин сыйлык сунуштады.