Израилдин премьер-министри Биньямин Нетаньяху шейшемби күнү, 2020-жылы Тель-Авивдин аймактык сотунда ачылган коррупция боюнча кылмыш ишинин алкагында айыптоолорго жооп берүү үчүн 81-жолу соттук отурумга катышты.
Нетаньяху 28-февралда Иранга каршы согуш башталгандан берки эки ай ичинде биринчи жолу сотко келди.
Нетаньяхунун сотко чыгуусу дүйшөмбү күнгө пландалган болчу, бирок ал «коопсуздук себептерин» жүйө келтирип, отурумду токтотууну талап кылган.
Израилдин "Маарив" гезити Нетаньяху көрсөтмөсүнүн акыркы этабында экенин билдирди.
Прокуратуранын маалыматы боюнча, коргоочулардын кыскача кайра суракка алуусунан тышкары, Нетаньяхунун дагы 11 күндүк көрсөтмөлөрү бар.
"Акыркы эки жумада анын соттук отурумдары өз каалоосу менен токтотулду жана Иран менен согуш башталгандан бери Израилдеги бардык соттук отурумдар кайра башталганына карабастан, эч кандай көрсөтмө берген жок", - деп жазды гезит.
Гезит Нетаньяхунун пара алуу, алдамчылык жана ишенимге кыянаттык кылуу айыптары коюлган №4000 кылмыш иши боюнча да көрсөтмө берерин кошумчалады.
Айыптоо корутундусуна ылайык, Нетаньяхунун "Walla" маалымат сайтынын мурдагы ээси, ишкер Шауль Элович менен паракорлук менен байланышы болгону болжолдонууда. Бул алкакта Нетаньяху жана үй-бүлөсүнүн өздөрү жөнүндө маалымат каражаттарында оң пикирдеги материалдардын жарыяланышын жана саясий атаандаштарынын кысымга алынышын талап кылган деп айыпталууда.
Бул соттук отурумдар Нетаньяхунун Израилдин президенти Исаак Герцогдон ырайым сураганы тууралуу кабарлардан улам коом ичинде карама-каршылыктар күчөп жаткан учурда өтүүдө.
Нетаньяху 30-ноябрда күнөөсүн мойнуна албастан жана саясаттан кетпестен туруп, ырайым кылуу өтүнүчү менен кайрылган.
Коррупция, паракорчулук жана ишенимге кынаттык кылуу
Нетаньяху 2020-жылы соттук териштирүү башталгандан бери коюлган айыптарды четке кагып, аны кызматтан алууну көздөгөн "саясий максаттагы өнөктүк" деп сыпаттаган.
Израиль мыйзамы президенттин кечиримин күнөөнү мойнуна албаган адамга берүүгө уруксат бербейт.
Нетаньяху 2019 -жылдын ноябрь айында 1000, 2000 жана 4000 номердүү үч кылмыш ишинде коррупция, пара алуу жана ишенимди кыянаттыкка пайдалануу боюнча айыптоолорго кабылууда.
1000-иште Нетаньяху жана үй-бүлөсүнүн бай ишкерлерден ар кандай жеңилдиктер үчүн кымбат белектерди алуу менен айыпталууда.
2000-иште ага Yedioth Ahronoth гезитин чыгарган Арнон Мозес менен өзү тууралуу оң кабарларды чыгаруу боюнча соодалашканы айтылууда.
Бул иштер боюнча соттук процесстер 2020-жылы башталып, азыркыга чейин уланууда.
Коррупция айыптоолоруна кошумча, Нетаньяхуга согуш кылмыштары жана адамзатка каршы кылмыштар боюнча Эл аралык кылмыш соту тарабынан 2024-жылы камакка алуу буйругу чыгарылган. Израилдин Газадагы кол салууларында 72 000ден ашуун адам каза болгон.
