Украинанын президенти Владимир Зеленский France 2 TV телеканалына берген маегинде, согуш талаасында каза болгон украин жоокерлеринин саны 55 000 деп болжолдонгонун айтты.
Шаршемби күнү жарыяланган маегинде Зеленский: "Украинада согуш талаасында каза болгон аскерлердин расмий саны 55000ди түзөт", - деп билдирди.
Украин лидери "көп сандаган адамдардын" расмий түрдө дайынсыз жоголгон деп эсептелгенин да кошумчалады.
Стратегиялык жана эл аралык иш-аракеттер борборунун (CSIS) изилдөөсүндө согушта болжол менен эки миллион аскердик кызматкердин каза болгону, жаракат алганы же дайынсыз жоголгону айтылды.
Отчетко ылайык, Орусия баштаган согуш болжол менен 1,2 миллион орусиялыктын жана 500000- 600000 украиналыктын өлүмүнө алып келди.
CSIS божомолуна караганда, согуш башталгандан бери, тактап атканда төрт жылдан бери орусиялык күчтөр 325 000ге чейин жоготууга учурады.
Кеңири кыйроо
Согуш карапайым тургундарга да кыйратуучу таасирин тийгизди.
Бириккен Улуттар Уюмунун байкоочулары 2025-жылы Украинада жарандардын өлүмү 2022-жылдан башка бардык жылдарга караганда көп болгонун катташты.
БУУнун Адам укуктары боюнча Жогорку комиссарынын кеңсеси 2025-жылы эле 2500дөн ашык жайкын тургун каза болуп, 12 000ден ашык жайкын тургун жаракат алганын, ошондой эле чыныгы сандар алда канча жогору болушу мүмкүн экенин айтты.
Көптөгөн отчеттордо Украинадагы кеңири кыйроолор шаарларды урандыга айлангандыгы, энергетикалык инфраструктуранын бир нече жолу бутага алынгандыгы жана миллиондогон адамдардын үй-жайсыз калгандыгы катталды.
Турак жайлар, транспорттук тармактар жана өнөр жай объектилеринин чоң бөлүгү бузулду же талкаланды, бул абал Украинанын экономикасына жана калыбына келтирүү аракеттерине оор жүк болууда.
