Басма сөз каражаттарынын кабарларына караганда, Иран Жапониянын мамлекеттик NHK телеканалынын Тегерандагы бюросунун башчысын камакка алды.
Шинносуке Кавашима аттуу журналисттин Эвин түрмөсүнө которулганы кабарланууда.
NHKнын өкүлү шаршемби күнү AFP агенттигине: "NHK катары ар дайым кызматкерлерибиздин коопсуздугун биринчи орунга коебуз. Азырынча биз кошумча комментарий бере албайбыз", - деди.
Өкмөттүн өкүлү Масанао Озаки 20-январда журналисттерге жапон жараны кармалганын кабарлаган, бирок чоо-жайын айтуудан баш тарткан.
Министрлер кабинетинин катчысынын орун басары Озаки: "Жапон өкмөтү 20-январда Ирандын Тегеран шаарында жергиликтүү бийлик тарабынан жапон жараны кармалганын ырастады. Бул камакка алуу окуясынан бери өкмөт Иран тарапты ал адамды тезинен бошотууга чакырып келет", - деп билдирди.
Озаки ошондой эле: "Биз сөз болуп жаткан адам, анын үй-бүлөсү жана башка тиешелүү тараптар менен байланыштабыз жана бардык зарыл жардамды көрсөтүп жатабыз",- деди.
