Францияда жайгашкан EuroPalestine ассоциациясы басып алынган Батыш Шериадагы мыйзамсыз Израиль конуштарында өндүрүлгөн жана Францияда сатылган курмаларды бойкоттоого чакырды.
Палестинанын укуктарын коргогон бул ассоциация мусулмандардын курма керектөөсү өскөн ыйык Рамазан айы бою Израиль өндүрүмдөрүн бойкоттоо чакырыгын улантты.
Ассоциациянын төрайымы Оливия Земор шаршемби күнү жасаган билдирүүсүндө, Францияда сатылган «Medjool» маркасындагы курмалардын басымдуу бөлүгү «мыйзамсыз Израиль конуштарынан же оккупацияга шериктеш компаниялардан келгенин» айтты.
Земордун айтымында, кээ бир кутуларда өндүрүлгөн өлкө катары Иордания же Марокко көрсөтүлгөн бирок продукциялар негизинен Израилге таандык.
Супермаркеттердеги маалымдоо иш-чаралары
Земор бойкот кампаниясынын алкагында кээ бир ыктыярчылар керектөөчүлөргө маалымат берүү максатында супермаркеттерде түшүндүрүү иштерин жүргүзүп жатканын жана максаты альтернативалуу продукцияларды колдонууну жайылтуу экенин белгиледи.
Франциянын мыйзамдарына ылайык, сатуучулар, өзгөчө кургатылган жемиштердин кайсы өлкөдөн келгенин ачык көрсөтүүгө милдеттүү экенин эске салган Земор, басып алынган Палестина аймактарынан келген продукциялар «Израиль» деп этикеткаланбашы керектигин баса белгиледи.
Мындан тышкары, бул продукцияларды бойкот кылуу Израилдин экономикасына терс таасирин тийгизерин айткан Земор, айрым көп улуттуу азык-түлүк компаниялары да "бойкоттун буталарынын" катарында экенин кошумчалады.
Израилдин Газага каршы геноциддик мүнөздөгү согушу 2023-жылдын октябрь айынан бери 72 000ден ашуун палестиналыктын өлүмүнө алып келди, алардын көбү аялдар жана балдар. Ошондой эле 171 000ден ашуун адамдын жаралануусуна себеп болду.
Газадагы Палестинанын Саламаттыкты сактоо министрлигинин маалыматы боюнча, октябрь айындагы ок атышууну токтотуу келишимине карабастан, Израиль күчтөрү бомбалоо жана ок атуу менен жүздөгөн мыйзам бузууларды ишке ашырды. Бул чабуулдарда да 603 палестиналык каза болуп, 1 618и жарадар болду.
